Բրովարիում H225 Super Puma ուղղաթիռի կործանման նախնական պատճառը օդաչուի սխալն է։ Տեղեկությունը հայտնում են ուկրաինական լրատվամիջոցները` հղում անելով Ուկրաինայի ՆԳՆ-ի աղբյուրներին։
Գերատեսչության աղբյուրը հայտնել է, որ ուղղաթիռը չափազանց ցածր է թռչել սաստիկ մառախուղի պայմաններում։ Ճանապարհին բարձրահարկ շենք նկատելով՝ օդաչուն փորձել է շրջանցել այն, բայց արդեն շատ ուշ է եղել. ուղղաթիռը թեքվել է և ընկել մանկապարտեզի մոտակայքում։
Նույն աղբյուրի խոսքով` ռադիոէլեկտրոնային ճնշման համակարգերի աշխատանքի պատճառով օդաչուն զրկվել է նավիգացիոն սարքերից օգտվելու հնարավորությունից։
Հիշեցնենք` Ուկրաինայի արտակարգ իրավիճակների պետական ծառայությանը պատկանող ուղղաթիռը հունվարի 18-ի առավոտյան ընկել էր Կիևի մարզի Բրովարի քաղաքում գտնվող մանկապարտեզի մոտ: Ուղղաթիռում 9 մարդ էր եղել, այդ թվում՝ ներքին գործերի նախարար Դենիս Մոնաստիրսկին, նրա առաջին տեղակալ Եվգենի Ենինը, գերատեսչության պետքարտուղար Յուրի Լուբկովիչը և նրանց օգնականները: Բոլորը մահացել էին։
Արտակարգ իրավիճակների պետական ծառայության տվյալներով՝ ուղղաթիռի կործանման հետևանքով մահացել է 14 մարդ, այդ թվում՝ մեկ երեխա, տուժել է 25 մարդ, որոնցից 11-ը երեխաներ են:
