Խաղաղություն հնարավոր է, եթե մենք մեր բոլոր միջազգային հարաբերություններում ոչ միայն այսօրվա, այլև ապագայի համար, հստակ արձանագրենք, որ ՀՀ ենք ճանաչում 29․800 քկմ տարածքը, ավելի կոնկրետ հայկական ԽՍՀ տարածքը, որը մենք 1991թ-ին անկախություն ենք ստացել։ Այս մասին ԱԺ արտահերթ նիստում կառավարության բյուջեի կատարողականի ներկայացման ժամանակ ասաց վարչապետ Նիկոլ Փաշինյանը։
«Մենք որևէ այլ երկրից որևէ այլ տարածքային պահանջ ոչ միայն չունենք, այլև չենք ունենալու։ Եթե մենք այդ միտքը չարձանագրենք, այն չդրաձնենք մեր հանրության սոցիալ-հոգեբանություն, ոչ ոք մեզ թույլ չի տալու զարգանալ։ Ոչ ոք չի համակերպվի այն մտքի հետ, որ մենք զարգանում ենք ուժեղանում ենք, որ այդ զարգացումն ու ուժը ուղղենք մեր երկրի դեմ՝ մեր երկրի տարածքներն ընդլայնելու համար: Ավելին՝ տվյալ պարագայում ոչ թե մեր զարգացումը թույլ չտալն է լինելու ուրիշների օրակարգի խնդիր, այլ մեր պետության գոյությանը թույլ չտալն է դառնալու ուրիշների օրակարգի խնդիր։ Այս իրավիճակում մեզ ոչ ոք չի օգնելու»,- ասաց նա։
Փաշինյանը նշեց, որ ինքը ոչ թե տեսության, այլ իրականության մասին է խոսում։
«Մեր զարգացման օրակարգի ռազմավարական նպատակը պետք է լինի տարածաշրջանային միջավայրի հետ ներդաշնակ և խաղաղ ապրելը, մեր երկրի անվտանգությունն ու բարեկեցությունը։ Սա հնարավոր է, եթե նույն ռազմավարությունը որդեգրեն նաև մյուսները։ Սա որևէ կերպ չի նշանակում մոռանալ մեր պատմությունը, այլ նշանակում է փոխել պատմության ընկալման դիտակյունը, սոցիալ-հոգեբանական ընկալումը։ Մենք ինքնիշխան պետության պատմագրություն ստեղծելու հարցում մեծ հաջողություններ չունենք ու մեր պատմագիտակամն բովանդակության մի զգալի հատվածը սահմանափակված է խորհրդային պատմագիտության կաղապարում, որն ինչ-որ առումով համահունչ է հայկական անկախ պետության չգոյությանը ու անգամ հակտոնյա է ինքնիշխանության հայեցակարգին։ Խոսքն ամենևին էլ պատմական փաստերի սխալ լինելու մասին չէ, այլ փաստերին նայելու դիտանկյունների, դրանից բխող եզրակացությունների ու հետևությունների մասին։ Մեր մեծագույն մոլորությունն այն է եղել, թե մենք խորհրդահայ պատմագիտության հենասյուների վրա կարող ենք անկախ պետական գիտակցութուն ստեղծել։ Օրինակ հայրենասիրության մեր մոդելի խնդիրը, ուզում եմ ևս մեկ անգամ արձանագրել մի լրջագույն պրոբլեմ․ ՀՀ-ն կամ հայկական պետականությունը հայրենասիրության մեր ավանդական մոդելի առաջնային օբյեկտ չի եղել երբևէ ու սոցիալ- հոգեբանական մակարդակում այս իրավիճակը պահպանվում է նաև այսօր։ Պատճառը մեկն է․ հայրենասիրության այդ մոդելի հեղինակը մենք ինքներս չենք ու սա ժամանակն է խոստովանել, մենք առավելագույնը համահեղինակ ենք, իսկ առավել հավանականությամբ՝ սպառող»,- ասաց Նիկոլ Փաշինյանը։
