Այսօր շրջափակված Արցախում «Ծիլ» տիկնիկային ստուդիան Ստեփանակերտի Պոլ Էլյուարի Տուն Ֆրանկոֆոնիայի կենտրոնում հանդես եկավ ներկայացման առաջնախաղով։
Մեզ հետ զրույցում ստուդիայի ղեկավար, Շուշիի պետական թատրոնի տիկնիկավար-դերասան Արմեն Գաբրիելյանն ասաց, որ իրենց գործունեության հիմքում միայն ու միայն Արցախում ապրող փոքրիկներին հեքիաթային աշխարհ տեղափոխելն է, նրանց ժպիտ պարգևելը։ Պակաս կարևոր չէ նաև այն գիտելիքը, որը փոխանցում է ստուդիան։
— Իրականում ստացել ենք գունեղ, երաժշտական, բազմաբովանդակ խաղերով հագեցած ներկայացում, որը տպավորել է հանդիսատեսին։ Շատ կարևոր է, որ Հովհաննես Թումանյանի հեքիաթը թատրոնի և կինոյի դրամատուրգ Վովա Արզումանյանը բեմականացրել է Արցախի բարբառով՝ այն համապատասխանեցնելով այսօրվա երեխաների հետաքրքրություններին, — ասաց Արմեն Գաբրիելյանը։
Մեր զրուցակիցը վստահեցնում է՝ շրջափակման պայմաններում ստեղծագործելը ևս վճռականություն է։
