Ուկրաինայի նախագահ Վլադիմիր Զելենսկին ասել է, որ Ուկրաինայի զինված ուժերը ձգտում են վերականգնել հարավում և արևելքում կորցրած բոլոր տարածքները։ Սակայն, ըստ նրա, պատերազմը կարելի է ավարտված համարել միայն այն դեպքում, եթե Ղրիմը վերադառնա Ուկրաինայի կազմ։ Այս կարծիքը նա հայտնել է CNN-ին տված հարցազրույցում։
«Մենք չենք կարող պատկերացնել Ուկրաինան առանց Ղրիմի, և քանի դեռ Ղրիմը գտնվում է ռուսական օկուպացիայի տակ, դա նշանակում է միայն մեկ բան՝ պատերազմը դեռ չի ավարտվել»,- ասել է Զելենսկին։
Պատասխանելով CNN-ի հարցին, թե հնարավո՞ր է սցենար, որով Ուկրաինան կարող է թողնել Ղրիմը, պետության ղեկավարն ասել է. «Այդ դեպքում դա հաղթանակ չի լինի»։
Ռուսաստանի և Ուկրաինայի միջև բանակցություններն ավարտվել են 2022 թվականի մայիսին։ Նույն թվականի հոկտեմբերին Վլադիմիր Զելենսկին հրամանագիր է ստորագրել, որով բացառվում է Ռուսաստանի հետ հետագա բանակցությունների հնարավորությունը, քանի դեռ այդ երկրի նախագահը Վլադիմիր Պուտինն է։ Ուկրաինայի նախագահը բազմիցս ընդգծել է, որ ռուս-ուկրաինական բանակցությունների վերսկսումը հնարավոր է միայն այն պայմանով, որ Ռուսաստանը համաձայնի դուրս բերել իր զորքերը։
