Երևանի թատրոնի և կինոյի պետական ինստիտուտում այսօր կայացավ մամուլի ասուլիս՝ նվիրված Երկլեզու դրամատիկական արվեստանոցի երրորդ թողարկմանը: Երկլեզու դրամատիկական արվեստանոցի նախագծի ղեկավար, դերասան, ռեժիսոր, պրոդյուսեր Սերժ Ավետիքյանը տեղեկացրեց, որ արվեստանոցի երրորդ թողարկումը կտևի մինչև 2024 թվականի ապրիլ ամիսը: Իսկ այդ ընթացքում հայ երիտասարդ դերասանների հետ աշխատելու համար Հայաստան կժամանեն հինգ կին արտիստներ: «Սա հնարավորություն է ծանոթանալու ֆրանսիացի արվեստի գործիչների աշխատանքային մեթոդաբանությանը և թատրոնի ու կինոյի ավանդույթներին, ժամանակակից միտումներին»,-նշեց Սերժ Ավետիքյանը:
Այս տարվանից դրամատիկական արվեստանոցը տեղակայվել է Երևանի թատրոնի և կինոյի պետական ինստիտուտում: Ռեկտոր Սառա Նալբանդյանի խոսքով՝ այն հաջողված նախագիծ է և ունի կիրառական մեծ նշանակություն ու կարևոր նպատակներ:
Ռեկտորը մանրամասնել է ընթացիկ ու սպասվող ծրագրերը, որոնք ամուր կապված են ֆրանկոֆոնիայի հետ: «Ֆրանսերենը բուհ բերելը, նաև մեր բուհը դեպի ֆրանկոֆոն երկրների բուհերի շարք տանելը միշտ երազանք է եղել։
Սեպտեմբերից սկսած` ԵԹԿՊԻ-ում ֆրանսերեն է դասավանդվում։ Արդեն հասցրել ենք ուսանողներ ընտրել Ավինյոնի ամառային դպրոցին մասնակցելու համար, նաև առաջիկայում կկարողանանք ֆրանկոֆոն երկիր Ռումինիա ուղարկել ուսանողների` փորձի փոխանակման համար»,-նշեց ռեկտորը: ՀՀ ԿԳՄՍ նախարարի տեղակալ Դանիել Դանիելյանն էլ ընդգծեց՝ եղբայրական երկիր Ֆրանսիան մշտապես Հայաստանի ու հայերի կողքին է, իսկ նմանօրինակ ծրագրերը ողջունելի են և ավելի սերտ համագործակցության հնարավորություն են ստեղծում: «Կարևորում եմ, որ արվեստի այս բուհը դառնա եվրոպական կրթական համակարգի մի մասնիկը և բոլոր չափանիշներով համապատասխանի աշխարհի բոլոր լավագույն արվեստի բուհերին»,-նշեց Դանիել Դանիելյանը՝ խրախուսելով բուհի ուսանողներին մասնագիտական կարողությունների զարգացման հարցում չսահմանափակվել առկա հնարավորություններով, այլ նոր մշակութային տարածքների ձգտել: Ասուլիսի բանախոսների շարքում էր նաև Ֆրանկոֆոնիայի միջազգային կազմակերպության Կենտրոնական և Արևելյան Եվրոպայի գրասենյակի պատասխանատու Էրիկ Պոպպը: Վերջինս ասաց, որ ուրախ է արձանագրելու ֆրանկոֆոնիայի տարեցտարի աճն ու ընդլայնումը։
«Ցանկանում եմ մասնավորապես շեշտել, թե ինչ կարևոր է Ֆրանկոֆոնիայի միջազգային կազմակերպության կողքին ունենալ ֆրանկոֆոնիայի համար պայքարող գործընկերներ, նաև` հանձինս ձեզ: Ավելորդ կլինի երևի թե վերադառնալ այն ողբերգական հանգամանքներին, որի մեջ այսօր ապրում է ձեր երկիրը։ Եվ ֆրանկոֆոնիան կարող է օգնել մշակութային առումով, որովհետև մեր զենքը մշակույթն է»,-նշեց Էրիկ Պոպպը:
Երկլեզու դրամատիկական արվեստանոցի գործընկերներից է նաև «Ազնավուր» հիմնադրամը: «Մենք այս նախագծի կողքին ենք, որովհետև նախագիծը ներկայացնում է Ազնավուրի տարերքներն ու սերերը՝ թատրոնը, երիտասարդությունը, ֆրանսերենը, ու այս ամենը` Հայաստանում և Հայաստանի համար: Մեզ համար նույնպես պատիվ է լինել երիտասարդների կողքին»,-ընդգծեց «Ազնավուր» հիմնադրամի գործադիր տնօրենի տեղակալ Կարինե Էվոյանը: Նշենք, որ այս տարի նախագիծն իրականացվում է Հայաստանում Ֆրանսիայի դեսպանության, Ֆրանսիական ինստիտուտի, Ֆրանկոֆոնիայի Միջազգային Կազմակերպության (OIF), Իլ դը Ֆրանս շրջանի, Փարիզի քաղաքապետարանի, «Ազնավուր» հիմնադրամի, ՀԲԸՄ Ֆրանսիայի, «SPFA» ընկերության, «Miassine» հիմնադրամի, ԵԹԿՊԻ-ի աջակցությամբ։ Ասուլիսի շրջանակում Երևանի թատրոնի և կինոյի պետական ինստիտուտի ռեկտոր Սառա Նալբանդյանը և «Երկլեզու դրամատիկական արվեստանոց» նախագծի ղեկավար Սերժ Ավետիքյանը ստորագրել են համագործակցության հուշագիր:
ԵՐԵՎԱՆԻ ԹԱՏՐՈՆԻ ԵՎ ԿԻՆՈՅԻ ՊԵՏԱԿԱՆ ԻՆՍՏԻՏՈՒՏ
Լուսանկարները` Սվետլանա Սարգսյանի
