Հայաստանից Ռուսաստան արտահանվող հարյուրավոր մեքենաներ օրեր շարունակ մնացել են Լարսի անցակետում և չեն կարողանում հատել սահմանն ու Ռուսաստան հասնել։
Անցակետում և Լարսի ճանապարհին հայկական արտադրության ծաղիկներով, միրգ-բանջարեղենով և սննդամթերքի այլ տեսակներով բեռնված բեռնատարները ֆիտոսանիտարական խիստ վերահսկողություն են անցնում։
Aysor.am-ի թղթակցի հետ զրույցում «Ռոզ ֆիլդ» ջերմոցային տնտեսության տնօրեն Համբարձում Վարդանյանն ասաց, որ հիմնականում պատճառաբանվում է, թե ֆիտոսանիտարական հետազոտություն է իրականացվում, խնդիր են գտնում և չեն թույլատրում, որպեսզի բեռնատարներն անցնեն։
«Լարսում ունեինք ծաղիկով բեռնված 2 մեքենա՝ մոտ 70 հազար քանակ, որոնցից մեկը վերադարձել է, մյուսը ճանապարհին է, հետ է գալիս։ Ունենք նաև բեռնված մի մեքենա, որը Հայաստանի սահմանից դեռ դուրս չեկած, իրավիճակին տեղյակ լինելով, խնդրեցինք, որ հետ վերադառնա։ Միայն մեր մեքենաները չեն, բավական շատ մեքենաներ, հիմնականում մթերքով բեռնված, վերադառնում են։ Անցակետում մարդիկ նույնիսկ ասում են՝ իզուր ժամանակ եք վատնում հետազոտություն անցնելու վրա»,-ասաց Վարդանյանը՝ հավելելով, որ արդեն 4-րդ տարին է, որ ծաղկի շուկայում են, ծաղկի 70-80 տոկոսն իրացնում են ռուսական շուկայում. առաջին անգամն է, որ նման պատճառաբանությունով մեքենաները հետ են գալիս։
Դիտարկմանը, թե տնտեսվարողները նշում են, որ այս ամենը կապված է հայ-ռուսական հարաբերություններով, և ռուսական կողմն այս տարբերակով ճնշումներ է փորձում գործադրել հայկական կողմի վրա՝ «Ռոզ Ֆիլդ» ընկերության տնօրենը պատասխանեց.
«Միանշանակ ասել, որ չէ՝ չի կարելի։ Այն, որ կա այլ պատճառ, որը խանգարում է այսօր մեր ապրանքն իրացնել Ռուսաստանի Դաշնությունում՝ այդպես է։ Մինչև ՀԱՊԿ-ի նիստը, առատ ձյան պատճառով ճանապարհը փակ էր, մեքենաները կանգնած էին, մաքրեցին, ճանապարհը բացվեց և մեքենաները սկսեցին շարժվել՝ մինչև սահման հասան։ Երբ հասան սահման, արդեն այս խնդիրն առաջ եկավ»։
Հարցին, թե պնդո՞ւմ է, որ պատճառը ՀԱՊԿ նիստին հայկական կողմի չմասնակցելն է՝ տնօրենը պատասխանեց. «Միգուցե։ Չեմ ուզում ո՛չ պատահականություն համարել, ո՛չ էլ կարող եմ պնդել, որովհետև հենց հաջորդ օրվանից սկսվեց այս պատմությունը»։
