ՄՊՀ-ԻՑ NewDay.am-ին հայտնում են․
ԵՄ-Հայաստան համապարփակ և ընդլայնված գործընկերության համաձայնագրի /CEPA/ շրջանակում մեկնարկել է սպառողների շահերի պաշտպանության ոլորտի զարգացմանն ուղղված աջակցության նոր ծրագիր:
Ծրագրով նախատեսվում է սպառողների շահերի պաշտպանության վերաբերյալ ՀՀ օրենսդրությունը և իրավակիրառ պրակտիկան մոտարկել ԵՄ լավագույն փորձին, ինչպես նաև զարգացնել Հանձնաժողովի ինստիտուցիոնալ կարողությունները:
Սպառողների շահերի պաշտպանությունը Մրցակցության պաշտպանության հանձնաժողովի գործունեության կարևոր առաջնահերթություններից է, և հանձնաժողովը նպատակ ունի ընդարձակել գործունեության ծածկույթն այս ոլորտում: Նշենք, որ 2023 թվականի նոյեմբերից Հանձնաժողովը միացավ նաև Սպառողների պաշտպանության և օրենսդրության կիրարկման միջազգային ցանցին (ICPEN)՝ դառնալով վերջինիս գործընկեր երկիր:
Ծրագիրն իրականացվում է Լեհաստանի մրցակցության և սպառողների շահերի պաշտպանության գրասենյակի հետ համագործակցությամբ, որի փորձագիտական առաջին առաքելությունն օրերս ժամանել է Հայաստան:
Առաքելության շրջանակում Մրցակցության պաշտպանության հանձնաժողովի պատասխանատուները և լեհ փորձագետները ուսումնասիրում են սպառողների պաշտպանության վերաբերյալ ՀՀ գործող կարգավորումները, իրավակիրառ պրակտիկան՝ համակարգի ուժեղ և թույլ կողմերը գնահատելու, մոտարկման ու բարելավման անհրաժեշտություն ունեցող հարցերը նախանշելու և կատարելագործման առաջարկություններ ներկայացնելու նպատակով:
Ծրագրի շրջանակում աշխատանքային քննարկումներ են տեղի ունեցել նաև Արդարադատության նախարարության և էկոնոմիկայի նախարարության պատասխանատուների հետ:
