Ի վերջո ի՞նչ է նշանակում հղումը ԼՂ-ի և ՀՀ-ի միավորման որոշման մասին, որը հռչակագրի մեջ հիշատակվում է․ եթե հենվում ենք դրա վրա՝ խաղաղությունը անհնար է։
Այս մասին ԱԺ-Կառավարություն հարցուպատասխանի ժամանակ նշեց վարչապետ Նիկոլ Փաշինյանը։
«Մենք պետք է դուրս բերենք մեր պետության բովանդակության մեջ ներքին հակասություններն ու հակադրությունները և պետք է առերեսվենք դրանց հետ, պետք է հասկանանք՝ ինչ է նշանակում։
Արձանագրենք, որ քաղաքական տեքստերը ունեն իրականացում և դրանք անպայման ունենում են արդյունք և հետևանք։
Հռչակագրի նախաբանում 3 հիմնական ուղենիշ է դրված։ Ուղենիշներից մեկը հայ ժողովրդի իղձերն են, երկրորդը՝ պատմական արդարությունը, երրորդը՝ Լեռնային Ղարաբաղի հիմնախնդիրը։ Այստեղ խնդիրը հետևյալն է, իսկ ո՞րն է պատմական արդարությունը։ Ընդ որում կարող է լինել պատմական արդարության ամենատարբեր մեկնաբանություններ և պրոբլեմը այդտեղ է, որ մենք ասել ենք, պետության հիմքում դրել ենք պատմական արդարության ձգտումը, բայց չենք ձևակերպել՝ որն է այդ պատմական արդարությունը։
Որովհետև Հայաստանի ամենատարբեր քաղաքական ուժեր, խմբեր, գաղափարախոսություններ պատմական արդարություն ասելով հասկանում են բոլորովին տարբեր բաներ։
Ո՞րն է հայ ժողովրդի իղձը։ Սա պրակտիկ հարց է, տեսական հարց չի։
Հայ ժողովուրդը բնակվում է տարբեր պետություններում։ Մենք վստա՞հ ենք, որ այդտեղ ապրող հայ ժողովրդի իղձերը նույնական են։
Մենք դրանում համոզված ե՞նք։ Եթե համոզված ենք, որտե՞ղ է դա ձևակերպված։
Եվ երրորդը, ի վերջո ի՞նչ է նշանակում հղումը Լեռնային Ղարաբաղի և Հայաստանի Հանրապետության միավորման մասին որոշման, որը հռչակագրի մեջ հիշատակվում է։
Մենք մեր քաղաքականությունը կառուցու՞մ ենք դրա վրա։ Եթե այո, դա նշանակում է, որ մենք ինչ խաղաղության մասին ենք խոսում։ Դա նշանակում է, որ խաղաղությունը անհնար է։ Սրա մասին է խոսքը, ոչ թե լավ է, վատ է»,- հայտարարեց նա։
