ԱԺ-ում հրավիրված «Հայաստանի եվրաինտեգրման նոր հեռանկարները և մարտահրավերները» թեմայով լսումերին ՀՀ-ում ԵՄ պատվիրակության ղեկավար, դեսպան Վասիլիս Մարագոսը ասաց, որ երբևիցե այսքան դինամիկ գործընթաց չի եղել երկկողմ՝ ԵՄ և Հայաստան երկխոսության համար, ինչպես նաև երկկողմ հարաբերությունների առավել զարգացման համար։
Ըստ նրա՝ ԵՄ-ն շարունակում է իր աշխատանքը Սյունիքում։
«Մեր անդամ պետությունների հետ միասին մենք 120 մլն եվրոյից ավելի գումար ենք մոբիլիզացրել 35-ից ավելի ծրագրի շուրջ Սյունիքում»,- նշեց նա։
Նա նաև ասաց, որ Հայաստանում շատերը կենտրոնացած են անվտանգային խնդիրների շուրջ, նա ավելացրեց նաև, որ այս ոլորտում կա համագործակցության առաջխաղացում։
Նրա խոսքով՝ ԵՄ-ն մտադիր է աջակցել ՀՀ զինված ուժերին ոչ մահաբեր զենքերի տեսակետից, էական աջակցության մասին է խոսքը, որպեսզի կարողանան ուժեղացնել կարողությունները․ սա վերաբերում է Եվրոպական խաղաղության մեխանիզմի շրջանակներին։ ԵՄ-ն շարունակում է ամբողջական հանձնառու մնալ տարածաշրջանում իրավիճակի կայունացման և կարգավորման հարցին՝ ներառյալ այն հանդիպումները որ կազմակերպվել են Եվրախորհդի նախագահի կողմից։
Մարագոսը հավելեց, որ վստահ է՝ շատ հստակ արդյունքների կհասնեն միասին։ ԵՄ-Հայաստան համագործակցությունը շատ կարևոր է օրենքի գերակայության համար․ իրենք նաև պատրաստվում են վաղը Բրյուսելում Հայաստանի հետ փաստաթուղթ ստորագրել, որը կխորացնի համագործակցությունը քրեական գործերի շրջանակներում և կապահովվի բարձր ստանդարտներ անձնական տվյալների պաշտպանության դատական անկախության և օրենքի գերակայության համար։
