ԱԺ «Պատիվ ունեմ» խմբակցության քարտուղար Տիգրան Աբրահամյանն ուշագրավ է համարում ՀՀ փոխվարչապետ Մհեր Գրիգորյանի գրասենյակի հայտարարությունը, որ սահմանազատման գործընթացը Տավուշի մարզից սկսելու վերաբերյալ դեռ որոշում չկա:
Լրագրողների հետ զրույցում Աբրահամյանը ասաց, որ իշխանությունը պնդում էր, որ արդեն սկսվել է գործընթացը: Պետք է արձանագրել՝ փոխվարչապետի գրասենյակի հայտարարությունն արձանագրում է, որ իրենց քաղաքական ղեկավարը սուտ է խոսել ու ասել, որ Տավուշից է սկսվելու, երկրորդ՝ արձանագրվել է, որ իրականության մեջ Ադրբեջանի հետ չկա պայմանավորվածություն` առաջ մղելու այս գործընթացը։
Ըստ նրա`սա ևս մեկ անգամ ցույց տվեց, որ իշխանությունը ոչ թե գնում է սահմանազատման գործընթացի, այլ` միակողմանի զիջումների:
Նա համոզված է, որ ՀՀ ԶՈՒ գլխավոր շտաբում լավ գիտեն, թե ինչ է նշանակում Տավուշի այդ հատվածների հանձնումը և դա խնդիր է՝ հետագայում Զինված ուժերի վերատեղակայումների առումով:
«Ես ձեռնամուխ կլինեմ, որ ավելի կոնկրետ հասկանանք, թե ԳՇ-ն ինչ է առաջարկել ու եթե առաջարկել է` ինչ է եղել դրա հիմքում»,- նշեց Աբրահամյանը:
Հիշեցնենք, որ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը երեկ հայտարարել է, որ ՀՀ ԶՈՒ գլխավոր շտաբն է նպատակահարմար գտել, որ սահմանազատման գործընթացը սկսվի Տավուշից։
