Երևանի ավագանու այսօրվա նիստում կրքերը բորբոքվեցին։ Նախ «Ազգային առաջընթաց» խմբակցության անդամ Սամվել Մելիքյանը միացրեց ձայնագրություն, որտեղ ասվում էր, թե նույնիսկ 7,000 տարվա ծառը չի կարող համարվել հին և հատվել․
Ձայնագրության մեջ ասվում էր, որ թեղիների կյանքը 50 տարի է, հին ծառերը լինում են 7,000 տարվա։
Ըստ Սամվել Մելիքյանի՝ խոսքերի հեղինակը ՔՊ-ական Արթուր Մանուկյանն է։
Այս ելույթին ի պատասխան ՔՊ-ական ավագանու անդամ Նուարդ Վարդանյանը ևս ձայնագրություն միացրեց, որտեղ «Ազգային առաջընթաց» խմբակցության անդամ Քրիստինա Վարդանյանը հայտարարում է, թե քաղաքի թեղիները պետք է հատվեն։
Ըստ Նուարդ Վարդանյանի՝ Քրիստինա Վարդանյանը դա հայտարարել է 2020 թվականին, իսկ հիմա լրիվ այլ բան է ասում, հիմա խոսում է ծառերի հատման դեմ։
Քրիստինա Վարդանյանը տեղից արձագանքեց, թե խոսքը Մաշտոցի պուրակի մասին էր։ Քրիստինա Վարդանյանը ընդհատում էր Նուարդ Վարդանյանին։ Իրավիճակին արձագանքեց քաղաքապետ Ավինյանը․
«Մի՛ ընդհատեք տիկին Վարդանյան, Դուք ձայնից զրկվում եք, դուք խախտում եք կանոնակարգը։ Դուք ձեր իրավունքն ունեք, դուք խոսել եք 2020 թվականին, հիմա էլ եք խոսել հնարավոր 180 աստիճան հակասելով ձեզ։ Մարդիկ ուզում են ցույց տալ, թե ինչ եք խոսել, ինչքան եք հակասում ձեզ և դա այնքան ցավոտ է, որ չեք կարող չընդհատել, լռե՛ք և լսե՛ք ձեր իսկ խոսքը 2020 թվականին և հիմա։ Հերիք է մանիպուլացնեք ու սուտ խոսեք»։
Վարդանյանը պատասխանեց․
«Դուք եք մանիպուլյացիայի արքայազնը»։
Նուարդ Վարդանյանը, շարունակելով ելույթն, ասաց, որ երբ մարդը սխալ է անում ու դիմացինը փորձում է այդ սխալը նրան ասել, մարդու մոտ առաջացած առաջին ռեակցիան դա ագրեսիան է։
Նա կրկին միացրեց Վարդանյանի՝ 2020 թվականի ելույթը, որտեղ վերջինս ասում էր՝ թեղիները պետք է հեռացվեն, թեղիները սպառել են իրենց կյանքի տևողությունները։
Վարդանյանը էլ նշեց, թե Թամանյանի արձանի մոտ հացենիներ են, ոչ թե թեղիներ։
