Ես խնդիրներ տեսնում եմ և պետական իրավասու մարմիններին այդ մասին տարբեր ձևաչափերով բազմիցս եմ հայտնել: Այս մասին կառավարության նիստից հետո լրագրողների հետ զրույցում ասաց ՄԻՊ Անահիտ Մանասյանը՝ անդրադառնալով վարչապետ Նիկոլ Փաշինյանի բարձրացրած խնդիրներին:
«Որպես մարդու իրավունքների պաշտպան՝ արձանագրեմ, որ մեր հանրապետությունում մարդիկ չպետք է լինեն, որոնք իրենց զգան արտոնյալ, ընդ որում կապ չունի դրանք երիտասարդներ են, նախկին իշխանական, ներկա իշխանության ներկայացուցիչներ, թե այլ անձինք և քաղաքացիներ: Նաև չպետք է լինեն քաղաքացիներ, որոնք իրենց արժանապատվությունը և իրավունքները հարգված չեն զգում»,- ասաց նա:
Մանասյանը նշեց, որ տարբեր իրավասու մարմինների շրջանում տեսնում է արհեստավարժության շատ լուրջ պակաս։
«Դրա առնչությամբ ես անընդհատ խոսել եմ, հիմա էլ եմ խոսում, արձանագրում։ Խնդիրների մի մասը բխում է նրանից, որ շատերն ընդհանրապես չունեն պատշաճ գիտելիքներ և հմտություններ տարատեսակ ոլորտներում։ Պետք է աշխատենք այդ խնդիրների լուծման ուղղությամբ»,-ասաց ՄԻՊ-ը։
