Ազգային ժողովի Պաշտպանության և անվտանգության հարցերի մշտական հանձնաժողովի նիստում ՀՀ պաշտպանության նախարարի տեղակալ Արման Սարգսյանը ներկայացրեց օրենքների նախագծերի փաթեթ, որով առաջարկվում է գործող աշխարհազորի համակարգը փոխարինել տեղական պաշտպանության ուժերով։
Սարգսյանը մանրամասնեց, որ տեղական պաշտպանության ուժերի խնդիրները, դերը, ղեկավարման սկզբունքներն ու կառուցվածքը հստակորեն սահմանվում են նախագծով։
Տեղական պաշտպանության ուժերը ենթարկվելու են բանակային կորպուսի հրամանատարին և ընդգրկվելու են զորամիավորման ենթակայությամբ գործող զորամասերի կազմում՝ որպես աջակցող ստորաբաժանումներ։
«Տեղական պաշտպանության ուժերը համալրվելու են տվյալ համայնքում հաշվառված անձանցով, ովքեր չեն կցագրվել պատերազմական ժամանակի հաստիքներին, հաշվառված են պահեստազորի երկրորդ խմբում կամ հանված են զինվորական հաշվառումից։ Համալրումը կիրականացվի կամավորության սկզբունքով՝ համապատասխան անձանց հետ պայմանագրի կնքման միջոցով, որը չի համարվում զինվորական ծառայության պայմանագիր»,- ասաց Սարգսյանը։
Նա նշեց, որ նոր համակարգի նպատակն է կազմակերպել քաղաքացիների պատրաստության և ներգրավման գործընթացը, որը հիմնականում պահպանելու է այն պայմանները, որոնք նախկինում սահմանված էին գործող աշխարհազորի մասին օրենքով։
Նախագծերի փաթեթով նախատեսվում է դադարեցնել աշխարհազորին վերաբերող մի շարք դրույթների գործողությունը, մասնավորապես «Տարածքային կառավարման մասին», «Երևան քաղաքում տեղական ինքնակառավարման մասին» և «Տեղական ինքնակառավարման մասին» օրենքներում։
