Ես իրականում գիտակցում եմ՝ ինչ պատասխանատվություն եմ վերցնում ինձ վրա, շատ լավ պատկերացնում եմ այն խնդիրները, որոնք գլոբալ են, իսկ լոկալ խնդիրները տեղում պարզ կդառնան: Այս մասին ԱԺ-ում ասաց Շիրակի մարզպետի ՔՊ-ական թեկնածու Դավիթ Առուշանյանը:
Դիտարկմանը՝ վերջին 6 տարիներին մարզում երկու բան է փոխվել՝ մարզպետ և մարզի ցուցանակը, նա արձագանքեց. «Մարզը, մասնավորապես 180 աստիճանով է փոխվել: Բազմաթիվ ծրագրեր են արվել Գյումրիում՝ փողոցաշինությունից սկսած մինչև այգիներ, պուրակ, մանկապարտեզ, դպրոց և այլն»:
Ինչ վերաբերում է արդեն նախկին մարզպետ Մուշեղ Մուրադյանի ազատմանը, ով կառավարության նիստից առաջ հայտարարել էր, թե իր ազատման մասին որևէ քննարկում չկա, նա ասաց.
«Պարոն Մուրադյանի հետ կապվածը չեմ կարող մեկնաբանել, միայն կարող եմ ասել, որ չեմ կարծում՝ պարոն Մուրադյանը դիմում է գրել կառավարության նիստի ժամանակ»:
Ապա նա անդրադարձավ քննադատություններին, թե վարչապետը sms-ներով է պաշտոնյաներին հեռացնում, նա ասաց, որ կուսակցության ղեկավարը, վարչության նախագահն իր կուսակից գործընկերոջը կարող է խնդրել պաշտոնից դուրս գալու համար, դա շատ նորմալ ժողովրդավար պատկեր է:
«Դուք տանում եք մի ուղղությամբ, թե երկրի վարչապետն է խնդրել, ես էլ տանում եմ, որ կուսակցության ղեկավարն է խնդրել, որոնք չեն մերժել, դա շատ նորմալ ու ժողովրդավար է: Միաժամանակ, սահմանադրական նորմերը պահպանվում են, և ես իմ հասուն տարիքում չեմ հիշում, որ երբևէ ՀՀ-ն եղել է այսքան ժողովրդավար և երբևիցե եղել է, որ բոլոր ինստիտուտները հարգված են եղել և յուրաքանչյուրն իր տեղում ու դիրքում է եղել»,- հայտարարեց Առուշանյանը:
