ԱՄՆ նախագահ Ջո Բայդենը 2025 թվականի հունվարի 9-ը սգո օր է հայտարարել երկրի նախկին ղեկավար Ջիմի Քարթերի մահվան կապակցությամբ։
Բայդենի հրամանի համաձայն՝ երկրի և արտերկրի պետական հաստատություններում 30 օրով կիջեցվեն ազգային դրոշները։
Ավելի վաղ ԱՄՆ նախագահը ցավակցություն էր հայտնել Քարթերի մահվան կապակցությամբ՝ նրան անվանելով «ականավոր առաջնորդ, պետական գործիչ և հումանիստ»։
Քարթերի հրաժեշտի արարողությունը տեղի կունենա Վաշինգտոնում։
ԱՄՆ 39-րդ նախագահ (1977-1981թթ.) Ջիմի Քարթերը դարձել է Սպիտակ տան առաջին ղեկավարը, որը հասել է 100 տարեկանի: Քարթերի վարչակազմի աշխատանքը բնութագրվում էր ԽՍՀՄ-ի հետ հարաբերությունների վատթարացմամբ։ Իր պաշտոնավարման ժամկետն ավարտելուց հետո նա զբաղվել է բարեգործությամբ։ Իր կարիերայի ընթացքում քաղաքական գործիչը բազմաթիվ մրցանակներ է ստացել, այդ թվում՝ Խաղաղության Նոբելյան մրցանակ (2002 թ.)։
