Balkan Insight-ը հայտնում է, որ Հունաստանի դատական իշխանությունները հայտարարել են թմրանյութերի ապօրինի շրջանառության մեղադրանքով կալանավորվել է Իզաթ Հանըմ Ջավադովան։ Նա ակումբներում հանդես է եկել որպես դիջեյ և հանդիսանում է Ադրբեջանի նախագահ Իլհամ Ալիևի ազգականը (զարմուհին)։ Նա հանդես է եկել Mikaela և Mikaela Jav անուններով։
Ջավադովան ձերբակալվել է դեկտեմբերի 30-ին Աթենքի մերձակայքում կազմակերպված երեկույթի ժամանակ, որտեղ ոստիկանությունը թմրանյութ է առգրավել։ Հունասատանի ոստիկանությունից հայտնել են, որ գործի նյութերը ներառում են և՛ թմրամիջոցների օգտագործման, և՛ թմրամիջոցների ապօրինի շրջանառության մեղադրանքներ։
Հունական լրատվամիջոցների տվյալներով, դիջեյը հերքել է մեղադրանքները։
«Ես չեմ կազմակերպել երեկույթը կամ հրավերներ ուղարկել… Բացի այդ, նրանք ինձ մոտ թմրանյութեր չեն հայտնաբերել», — ասել է նա:
Ընդհանուր առմամբ, հունական ոստիկանությունը երեկույթին մասնակցող տասը մարդու է ձերբակալել թմրանյութեր պահելու, ապօրինի շրջանառության և տարածման մեղադրանքով, այդ թվում՝ դիջեյին։
Ջավադովան, որը ելույթներ է ունեցել ամբողջ Եվրոպայի ակումբներում, արդեն հայտնվել էր սկանդալների կենտրոնում։
2021 թվականին Կազմակերպված հանցավորության և կոռուպցիայի ուսումնասիրման կենտրոնը (OCCRP), Transparency International-ի հետ համատեղ հետաքննության ընթացքում պարզել է որ Ջավադովան և նրա ամուսին Սուլեյման Ջավադովը հետաքննվում են Մեծ Բրիտանիայի հանցավորության դեմ պայքարի ազգային գործակալության կողմից՝ կասկածելի աղբյուրներից 13.9 միլիոն ֆունտ ստեռլինգ ստանալու հաղորդումների պատճառով:
Զույգը 20 օֆշորային ընկերությունների ցանց է օգտագործել՝ այդ միջոցները Մեծ Բրիտանիա ուղարկելու համար: Այս ընկերություններից վեցը, ենթադրաբար, եղել են ֆինանսական գործիքի մաս, որով Ադրբեջանի իշխող վերնախավը փողեր է յուրացրել, լվացել դրանք և կաշառել արևմտյան քաղաքական գործիչներին:
Նրանց պարտադրվել է ավելի քան 4 միլիոն ֆունտ ստեռլինգ վերադարձնել։
