Քաղաքացի Սոնա Մուրադյանը «Հրապարակ»-ին ահազանգում է՝ Նոր Խարբերդի ամառանոցների երրորդ փողոցում գտնվող մոր տունը հրդեհի հետեւանքով մոխրի է վերածվել։
«Փրկարարների 5 ջոկատ է եկել, բոլոր գործողությունները կատարել են, ոստիկանությունը եկել ա, մեզնից զանգել նկարներ են ուզել, բայց օգնության մասին ոչ մի խոսք չկա։ Մայրս 70 տարեկան կին է, ապրում էր իր թոռնիկի՝ իմ տղայի հետ միասին։ Հրդեհից անցել է 10 օր, սակայն ո՛չ Շենգվիթի թաղապետարանից, ո՛չ քաղաքապետարանից որեւէ լուր չկա»,-պատմեց նա։
Հրդեհը մարելուց հետո իրավապահներն ասել են՝ ամենայն հավանականությամբ էլեկտրալարերից է բռնկվել, սակայն Սոնա Մուրադյանը չի հավատում։
«Երբ արդեն մարել էին կրակը, ես իմ աչքով եմ նայել՝ որտեղ միացրած է պլիտան, հրդեհի հետեւանք չկա։ Էլեկտրալարերը նոր էինք քաշել, ու ինձ համար անհավանական է թվում, որ հրդեհը առաջանար էլեկտրալարերից»,-ասաց նա։
Նա պատմեց, որ հրդեհված տան ապրանքն ամբողջությամբ անպիտան է դարձել։
«Տան մեջ եղել է մոտ 300 հազար դրամ գումար, նոր լվացքի մեքենա, սառնարան, մի խոսքով՝ ամբողջ գույքը այրվել է, նկարներից երեւում է։ Գոնե շինանյութով օգնեն, տունը կարողանանք վերանորոգել»,-ասաց նա։
