Հայաստանը Թուրքիային է արտահանձնել երկու անձի, որոնք Թուրքիայում ներգրավված են եղել կազմակերպված հանցավորության մեջ։ Այս մասին հայտնում է ՀՀ ԱԳՆ-ն։
«Կազմակերպված հանցավորության մեջ ներգրավված երկու անձի Հայաստանից Թուրքիա արտահանձնման վերաբերյալ.
Արձագանքելով Ինտերպոլի Կարմիր ծանուցմամբ ներկայացված խնդրանքին` 2025 թվականի հունվարի 19-ին Հայաստանը Թուրքիային է արտահանձնել երկու անձի, որոնք Թուրքիայում ներգրավված են եղել կազմակերպված հանցավորության մեջ»,-նշված է հրապարակման մեջ։
Թուրքական լրատվամիջոցները տարածել են թուրքական հանցավոր խմբավորման անդամների Հայաստանից արտահանձնման կադրերը:
Տեսանյութից պարզ երևում է, որ հանցագործները տեղափոխվել են թուրքական ինքնաթիռով: Թուրքիայի ՆԳՆ-ի EM 805 հատուկ ինքնաթիռը վայէջք է կատարել Զվարթնոց օդանավակայանում, որով էլ կասկածյալներին դիմակավորված մեծ թվով հատուկ ստորաբաժանումների ծառայողները նրանց տեղափոխել են Թուրքիա:
Արտահանձնվածներից մեկը Թուքիայում հայտնի հանցավոր խմբավորման առաջնորդ Էրջան Յըլազն է, որը մեկ տասնամյակից ավելի գտնվել է հետախուզման մեջ, այս խմբավորումը բազմաթիվ սպանությունների և հանցավոր գործունեությունների հեղինակ է: Համենայն դեպս` այսպես են ներկայացնում թուրքական լրատվամիջոցները հղում անելով այդ երկրի պաշտոնական աղբյուրներին: