Ժամանակն է, որ բոլոր հայերը, հատկապես ՀՀ ղեկավարությունը, իրենց ձայնը բարձրացնեն. այս մասին սոցցանցում գրել է ամերիկահայ գործարար, բարերար Նուբար Աֆեյանը՝ Բաքվի բանտում աօպրինաբար պահվող Ռուբեն Վարդանյանի հարցով դիմելով ՀՀ վարչապետ Նիկոլ Փաշինյանին:
«Անտանելի է տեսնել ադրբեջանական ռեժիմի կողմից իմ վաղեմի բարեկամ և գործընկեր Ռուբեն Վարդանյանին հասցված ցավն ու անարդարությունը: Ժամանակն է, որ բոլոր հայերը, հատկապես Հայաստանի Հանրապետության ղեկավարությունը, իրենց ձայնը բարձրացնեն: Եթե ոչ մենք, ապա ո՞վ։ Եթե ոչ հիմա, ապա ե՞րբ», — նշել է նա:
Հիշեցնենք, որ գերծարար, բարերար, Արցախի նախկին պետնախարար Ռուբեն Վարդանյանը հացադուլ է հայտարարել Բաքվի բանտում՝ բողոքելով Ադրբեջանում իր դեմ իրականացվող անօրինականություններից ու ճնշումներից։ Նա ընտանիքի միջոցով դիմել է աշխարհի առաջնորդներին, միջազգային կազմակերպություններին, իրավապաշտպաններին, լրատվամիջոցներին, պատմել, որ զրկված է պաշտպանության իրավունքից, միջազգային փաստաբանների հետ շփումներից, իսկ ադրբեջանցի պաշտպանի նկատմամբ իրականացվում են ճնշումներ:
