Եկեք հրաժարվենք կոթողացման տրամաբանությունից, այն ինչ մեզ համար տաճար է, դեմը պիտի գրենք՝ տաճար, ինչի դեմը գրած չի տաճար, պետք է գրված չլինի տաճար։ Այս մասին կառավարության նիստում հայտարարեց ՀՀ վարչապետ Նիկոլ Փաշինյանը:
«Վերջերս գնում ենք տաճար մոմ վառելու այցելելուց հետո, կրթության նախարարին հարց եմ տալիս՝ պատմամշակութային հուշարձան է, չէ՞, որը այսօր կառավարում է ոչ կառավարությունը, ոչ էլ ՊՈԱԿ-ն է կառավարում, մենք խնդիր դնո՞ւմ ենք այնտեղի սանիտարական վիճակի մասին: Ես ձեզ պաշտոնապես ասում եմ, որ մեր եկեղեցիները չուլանացված են, չուլանացված, ով որտեղ ինչ ոչ պետքական ապրանք ունի դրված է այնտեղ:
Մարդն ինչի՞ համար է եկեղեցի մտնում, մտնում է ինչ-որ հոգևոր հաղորդակցության ունենալու, չէ՞, մեկ էլ տեսնում ես այստեղ աղբ է լցրած, այնտեղ աղբ է լցրած, այնտեղ ինչ-որ մեկի հին շորերն են, այնտեղ մեկը կոշիկներն է դրել, այնտեղ մեկը իր հին կռավատն է բերել դրել, բայց ո՞նց կարելի է այսպես էլի:
Ինչքան կարելի է այսքան կեղծ լինել, ինչքան կարելի է այդքան խոսել սրբության մասին ու այդքան արտասուրբ լինել, ինչքան կարելի է «ոտի տակ տալ» սրբությունները, մեկ էլ վա՜յ համալիրում բան է եղել»,- ասաց նա:
