Երեկ երեկոյան Տիգրան Մեծ պողոտայի ծառերն այս վիճակում էին՝ արմատները կտրած, բետոնապատած, բնաբաժակը խիստ նեղացված և «աչք շոյող» ստվարաթղթով փաթաթված։ Ծառը սնուցող արմատները 30-40 սմ խորության վրա են, պատռելով դրանք՝ դատապարտում եք բույսը։ Այս մասին գրել է Երևանի ավագանու անդամ Քրիստինա Վարդանյանը:
«Չգիտեմ, ով է մեղավոր, այս քաղշին նորմից դուրս գործն անողը, թե կոպտագույն խախտումներով արվածն ընդունողը։ Լավ դուք աչք չունե՞ք, դպրոց չեք գնացել, էս ինչ եք անում։ Արմատը կտրած ծառը մի օր չորանում, կամ շուռ է գալիս, բայց դա արդեն ուրիշ իշխանության օրոք կլինի և այս ամենն անողը ոչ մի կապ չի ունենա, մեղավոր կլինեն հասուն ծառերը, որ փոխարինել էր պետք։ Եվ այս ամենը հրամցվում է, որպես աննախադեպ աշխատանք, փայլուն կառավարում և մեծ նվաճում։
Գրածս բացարձակ ընդդիմադիր իշխանական դաշտում չէ, սա ոլորտիս ողբերգական վիճակի հերթական ապացույցն է։
Ում հետաքրքիր է գիտահենը, կարդացեք առաջին հղմամբ տեղադրված միջազգային չափորոշիչը։
2021թ. ծառերը շինհրապարակում պաշտպանելու մասով հատուկ ավագանու N 337-Ն որոշում պատրաստեցինք, որ բացառվեին նման դեպքերը։ Ոչ մի օգուտ»,-գրել է նա:
