Այսօր պետականություն ունենք, թողեք գնանք խաղաղության, հերիք է ժողովուրդ ջան, մենք պետք է պատրաստ լինենք մեր պետական սահմանները պահելու, արտաքին քաղաքականությունն էլ հոյակապ գնում է, բերեք չբզբզանք: Այս մասին այսօր՝ Եռաբլուրում, լրագրողների հետ զրույցում ասել է ԵԿՄ նախագահ Սասուն Միքայելյանը:
«Մեր զինվորների բարոյահոգեբանական վիճակը շատ բարձր է: Մենք միշտ հայի ձեռքով ենք պարտվել, պատմություն ուսումնասիրեք, կիմանաք՝ Վազգեն Սարգսյանին ԱԺ-ում գնդակահարելը, Մխիթար Սպարապետին վերացնելը: Վատ ղեկավարություն եղել է նախորդ իշխանությունների ժամանակ: Եթե մեր թշնամին 20 տարի ժամանակակից զենք ու զինամթերք էր առնում, էդ ու՞մ գլխին պետք է թափվեր, մեր գլխին, չէ՞: Մեղավոր չենք փնտրում, բայց միշտ էլ եղել է դավաճանություն»,- նշել է նա:
Հարցին, թե ի՞նչ հետևանքներ կարող է ունենալ բանակում ծառայության ժամկետի կրճատումը՝ Սասսուն Միքայելյանը պատասխանեց, որ հետևանքներ չի կարող տալ.
«Ոչ մի հետևանք չի կարող տալ, որպես պաշտպանողական բանակ՝ արդեն ոչ մի հետևանք էլ չի ունենա, այսօր մեծ թվաքանակով մարդիկ զորավարժություններ են լրացնում, ընթացքում էլ՝ կամաց-կամաց պետք է անցնենք պրոֆեսիոնալ բանակի, սահմանապահ զորքերը կանգնած են ու կանգնելու են ամբողջ սահմանի երկայնքով»:
Անդրադառնալով բանակից գումարով ազատվելու մասին քննարկումներին՝ Միքայելյանը նշեց, որ դա իրեն չի հետաքրքրում, քանի որ դրանք պարզապես քննարկումներ են:
«Դե դա քննարկում է, ինձ չի հետաքրքրում, լուրջ բան չի: Երբ որ դարձա պատգամավոր, կպատասխանեմ ձեր հարցին: Ժամանակի ընթացքում քննարկվել է՝ ինչն է օգուտ բանակին, ինչը վնաս: Դա ընթացքում կերևա, ես հիմա այդ հարցին չեմ ուզում պատասխանել»:
Հարցին, թե կարծու՞մ է արդյոք, որ բանակն այժմ կազմաքանդված է, պատասխանեց.
«Ոչ, ոնց կարող է բանակը կազմաքանդ լինի, ես բանակի մոտ կանգնած եմ, մենք դիրքերում կանգնած ենք»:
