Ուկրաինական կոնֆլիկտի պարագայում կարեւորում են պարտադրված խաղաղության բացառումը. Ոչ մեկը չի կարող ինձ բացատրել, որ մարդիկ տարբեր են աշխարհի տարբեր կետերում: Այս մասին, այսօր «Հայաստանի իրական օրակարգ» թեմայով քննարկման շրջանակներում, լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը:
«Արցախի պարագայում ինքնորոշման իրավունքը հոմանիշ է կյանքի իրավունքին, այլապես յուրաքանչյուր արցախցու կողքին պետք է կանգնի մեկ խաղաղապահ, դրան այլընտրանք չկա: Ինչ վերաբերում է բանակցային գործընթացին, ես չեմ մանրամասնի, թե ինչ հանդիպման ընթացքում, այդպիսիք շատ են եղել, մեր միջազգային գործընկերներն ասում են հետեւյալը՝ ձեր իշխանությունները ինչ մեզնից ուզում են, դրա շուրջ էլ բանակցում ենք: Այստեղից կարելի է եզրակացնել, որ ՀՀ իշխանությունները Արցախի ինքնորոշման մասին ոչ մի տառ չեն ասում, ձեռքերը լվացել են Արցախից: Մեր միջազգային գործընկերներից մեկը պարզ հարց տվեց՝ եթե դուք զատում եք հայ-ադրբեջանական հարաբերությունները Արցախի բանակցություններից, ինչպե՞ս եք ապահովելու արցախահայության անվտանգությունն ու իրավունքները: Աշխարհը մեզ հետ անում է այն, ինչ մենք թույլ ենք տալիս իրեն մեզ հետ անել»,-ասաց Մամիջանյանը:
Նա համոզմունք հայտնեց, որ ընդդիմության եւ ողջ ժողովրդի ոչ թե մեղքը, այլ ամոթն է, որ իշխող խմբակը դեռ իշխանության է. «Լինելու են մարդիկ, որոնք նշանակվելու են մեղավորներ ու ես հիմա դիմում եմ Փաշինյանի նույնիսկ ամենանեղ թիմակիցներին, էդ որ հպարտանում եք, որ 5-6 հոգանոց չաթեր ունեք իրար հետ, ու ձեզ համարում եք անձեռնմխելի, իմացեք, որ Փաշինյան Նիկոլը փրկում է երկու բան՝ իր սեփական կաշին ու իր կաշվից աթոռը: Բոլորիդ է փուռը տալու: Թող նայեն ԳՇ նախկին պետերին, ԱԱԾ նախկին պետերին, իր կողմից գեներալի կոչում ստացածներին, բարձրաստիճան սպաներին, բարձրաստիճան պաշտոնյաներին: բոլորը ինչ-որ պահի մեղավոր են նշանակվելու, քավության նոխազ են լինելու: Դուք շատ բան ունեք պատմելու այն սրիկայությունների մասին, որոնք իրականացվել են պատերազմից առաջ եւ պատերազմի ժամանակ: Ոչ ոքդ անձեռնմխելի չեք, բոլորիդ նշանակելու է մեղավոր, ժամանակի հարց է»,-ասաց ընդդիմադիր պատգամավորը:
