Հնդկաստանում երկու տասնյակից ավելի փիղ հարբել է՝ խմելով գյուղացիների պատրաստած տնային ալկոհոլային խմիչքը: Արդյունքում հսկաները տապալվել են գետնին ու քնել:
24 փղից բաղկացած խումբը շրջում էր արևելյան Օդիշա նահանգի ջունգլիներով, երբ հանդիպել է մեծ կավե ամանների՝ լցված «մուհուա» ավանդական լիկյորով՝ պատրաստված madhuca longifolia ծառի ծաղիկից, գրում է Daily Mail-ը:
Սալիպադա գյուղի բնակիչները ալկոհոլով տարաները թողել էին ջունգլիներում, որպեսզի խմիչքը խմորվեր: Սակայն ավելի ուշ գալով տարաների մոտ՝ գյուղացիները տեսել են հետևյալ պատկերը. տարաները կոտրված են, իսկ դրանց բեկորների շուրջ ընկած են հարբած փղերը:
Տեղացիներին չի հաջողվել կենդանիներին արթնացնել խորը քնից։ Փղերն արթնացել են միայն այն ժամանակ, երբ հայտնվել են վայրի բնության հարցերով վարչության աշխատակիցները և սկսել թմբուկներ հարվածել: Արդյունքում փղերամը կարողացել է ոտքի կանգնել և դանդաղ քայլել դեպի անտառի խորքերը:
Բնակիչներից մեկի պատմելով՝ նախկինում փղերը ևս խմել են «մուհուա»՝ երբեմն ավերիչ հետևանքներով:
«Նրանք սիրում են դա։ Այն մաքուր է, համեղ է և թունդ»,- The Times-ին ասել է Wildlife SOS-ի գործադիր տնօրեն Կարթիկ Սաթյանարայանը:
Ըստ նրա՝ որոշ փղեր կախվածություն են ձեռք բերել «մուհուա»-ից և սկսել են կատաղի որոնումներ ալկոհոլի համար:
