ԱԺ Արտաքին հարաբերությունների հանձնաժողովի նախագահ Էդուարդ Աղաջանյանը կարծում է, որ Հայաստան-Ադրբեջան բանակցային գործընթացը փակուղում չէ։ Դեկտեմբերին կայանալիք Փաշինյան-Ալիև հանդիպման չեղարկման մասին Ադրբեջանի հայտարարություններին ի պատասխան՝ նա նշել է, որ Հայաստանը պայմանավորվածությունից չի հրաժարվում։
«Մենք չենք համարում, որ իրավիճակը փակուղային է, մենք ընդամենը արձանագրել ենք, որ կար հստակ պայմանավորվածություն, և Հայաստանն այդ պայմանավորվածությունից հետ չի կանգնում»,- ասել է Աղաջանյանը՝ հավելելով՝ Ադրբեջանը նախնական պայմանավորվածություններից հրաժարվելու գործելաոճ նախկինում էլ է ցուցաբերել։
Դիտարկմանը, որ Ադրբեջանն արդեն հայտարարում է, որ իրենց 8 գյուղեր գտնվում են հայկական օկուպացիայի տակ, արդյոք սահմանազատման ուղղությամբ գործընթաց ընթանում է, Աղաջանյանը պատասխանեց.
«Գործընթացներին պետք է մոտենանք ընդհանուր ժամանակի կոնտեքստում: Դա չպետք է ընկալել ամենօրյա հանդիպումների տեսքով: Գործընթացներն, այո, ենթադրում են հանդիպումներ երկկողմանի, եռակողմ և այլ, բայց դրանց արանքում ոչ հրապարակային գործընթացներ և խոսակցություններ ևս տեղի են ունենում»:
