Լույս է տեսել «Գրական Արցախի» հերթական համարը։ Գլխավոր խմբագիր Վովա Արզումանյանը NewDay.am-ի զրույցում ասաց, որ պարբերականում հրատարակվում են Արցախում, Հայաստանում և Սփյուռքում ապրող ու ստեղծագործող հեղինակների ստեղծագործությունները։
Մեր զրուցակցի խոսքով տպագրության լուրջ խնդիր ունեն։ Այժմ չունեն աջակիցներ և չեն կարողանում ապահովել հրատարակելու պարբերականությունը։
Ժամանակին մի քանի անգամ դիմել են Արցախի ԿԳՄՍ նախարարություն, բայց մերժել են` ասելով, որ աջակցում են միայն գիտական աշխատությունների հրատարակմանը։
«Այսօր, ցավոք, շատերը չեն էլ գնահատում գրականությունը։ Այս ի՞նչ օրի ենք հասել, բոլորը գնում են շահի հետևից, չեն նայում` ինչ է կատարվում, ինչի կարիք ունի հասարակությունն ու ինչու պետք է ուշադրություն դարձնել գրականությանը»։
Գլխավորի խմբագրի խոսքով՝ ժամանակին եղել են բարեգութ մարդիկ, ովքեր իրենց աջակցել են, որոնց շնորհակալ են։
«Հիմա փակուղում ենք` ինչ ենք անելու հաջորդ տարի, ինչպե՞ս ենք ներկայանալու որպես «Գրական Արցախ»։ Չնայած այսօր շատ չար ուժեր նպատակադված, ամեն կերպ հրաժարվում են Արցախից, չհասկանալով, որ Արցախը նախ և առաջ հայի կենսագրության հաստատուն մասն է»,-եզրափակեց Վովա Արզումանյանը
