«Դե ֆակտո ստացվում է, որ եռակողմ հայտարարությամբ արձանագրված պարտավորությունը, այն է՝ վերահսկողության տակ պահել Լաչինի միջանցքը, չի կատարում նաև Ռուսաստանի խաղաղապահ զորախումբը: Իհարկե, նման բան տեղի է ունենում Ադրբեջանի ապօրինի գործողությունների հետևանքով, բայց սրանից իրավիճակը չի փոխվում, որովհետև ՌԴ խաղաղապահ զորախմբի ներկայության առանցքային իմաստը հենց դա է՝ թույլ չտալ, որ նման ապօրինություն տեղի ունենա», կառավարության դեկտեմբերի 22-ի նիստում հայտարարել է վարչապետ Նիկոլ Փաշինյանը:
Նիկոլ Փաշինյանն ըստ էության արձանագրում է բավականին պարզ իրողություն, բայց Հայաստանի քաղաքական ղեկավարության խնդիրը անշուշտ ոչ թե պարզ իրողություններն արձանագրելը, այլ լուծումներ փնտրելն է: Գուցե այդ փնտրտուքի վկայությունն է Նիկոլ Փաշինյանի հայտարարությունը այն մասին, որ պետք է աշխատել Լաչինի միջանցք ԵԱՀԿ կամ ՄԱԿ փաստահավաք առաքելություն գործուղելու ուղղությամբ: Իսկ ո՞րն է լինելու այդ փաստահավաք առաքելության իմաստը: Փաստահավաք առաքելությունը տեղում ի՞նչն է արձանագրելու: Որ ճանապարհը փա՞կ է, թե՞, որ ճանապարհը փակել են ոչ իրական բնապահպաններ: Իսկ որևէ երկրի համար դա գաղտնի՞ք է: Խոսքն այն երկրների մասին է, որոնք որևէ կերպ հետաքրքրված են ռեգիոնալ իրադրությամբ և ունեն դրա հետ կապված շահեր: Օրինակ, Բրիտանիայի գաղտնի հետախուզության ղեկավար Ռիչարդ Մուրը, որ օրերս այցելել էր Հայաստան ու հանդիպել նաև վարչապետ Փաշինյանին, տեղյակ չէ՞, թե ինչ կոնտինգենտ է փակել ճանապարհը և իրականում ով է դրա հետևում: Թե՞ տեղյակ չեն ամերիկյան կամ ռուսական հետախուզությունները, կամ Ֆրանսիան: Հետևաբար, ի՞նչ է անելու փաստահավաք խումբը Լաչինի միջանցքում, եթե խնդիրը շատ ավելի պարզ է՝ միջանցքը փակ է և պետք է բացվի:
Հնարավոր է, որ Երևանը փորձում է «մրցակցություն» ստեղծել ռուս խաղաղապահների համար: Դա մի կողմից թվում է տրամաբանական քայլ, մյուս կողմից սակայն պահանջում է չափազանց նրբանկատություն, որովհետև մրցակցության «զգացումը» կամ գիտակցումը մի բան է տնտեսության, մեկ այլ բան ռազմա-քաղաքականության հարցերում, այն էլ համաշխահային պատերազմի պայմաններում, որի իրողությունը փաստվում է ոչ միայն փորձագիտական մակարդակով, այլ ընդհուպ Հռոմի Պապի շուրթերով: Կասկածից վեր է, որ այն, ինչ տեղի է ունենում Լաչինում ենթակա է այդ պատերազմի տրամաբանությանը:
1in.am
