NewDay.am-ը ներկայացնում է ԱԺ նախկին պատգամավոր, քաղաքական վերլուծաբան Արման Աբովյանի վերլուծականը Բերձորի միջանցքում տեղի ունեցող գործընթացների վերաբերյալ։
Չի կարելի դիտարկել Բերձորի միջանցքի շուրջ տեղի ունեցող իրադարձությունները ,որպես լոկալ գործընթաց։
Ցավոք , այս իշխանությունները ինքնակամ, կամ իրենց աննորմալ թավշյա տրամաբանության ներքո, մեզ բոլորիս ներքաշեցին մեծ գերտերությունների առճակատման մեջ տարածաշրջանում։
Բերձորի միջանցքը դա ընդամենը մեծ խաղի էլեմենտ է ,որի ընթացքում ձևավորվում է մեր տարածաշրջանի նոր ճարտարապետությունը։
Եւ հաշվի առնելով իրադարձությունների զարգացման տրամաբանությունը համաշխարային գլոբալ առճակատման ներքո պետք է արձանագրել, որ Հայաստանի իշխանությունները ուղղակի ունակ չեն ԻՆՔՆՈՒՐՈՒՅՆ խաղալ այս բարդագույն «պարտիան»։Ասեմ ավելին, այսօր ոչ թե մենք ենք խաղում ,այլ մեզանով են խաղում …խաղում են մեր իրական ապագայի և մեր երեխաների կյանքի հաշվին։
Իշխանությունների անհեթեթ, ազգակործան, ապաշնորհ, իրարամերժ քայլերը, հայտարարությունները, խոսքերը փաստում են միայն մի բան, ցավոք մենք, որպես պետություն շարունակում ենք արագ «արյունաքամ» լինել , կորցնելով նույնիսկ տեսական հնարավորություն հետ պտտելու հակահայկական գործընթացների անիվը։
Իրական Ապագան բղավելով չի կերտվում, խաղաղությունը չի վաստակվում «խաղաղության դարաշրջան» հայտարարելով և խաղաղություն մուրալով հայասպան խուժաններից, իբր ժողովրդավարությունը որպես «բրենդ» ինքնին երբեք չի փրկել ոչ մի պետություն ոչնչացումից։ Դա անհեթեթ հիմարություն է։
Սա ուղղակի աքսիոմատիկ ճշմարտություն է, որի հետ այս «ոչ բռնի և թավշյա» իշխանությունները պարզապես հրաժարվում են առերեսվել, տանելով դեպի սպանդ մի ողջ ժողովուրդ։
Այնպես որ հույս չունենանք, որ Բերձորի միջանցքի հարցը Հայաստանից տարանջատված է ,եթե հիմա նույն պես տանուլ տանք , ապա սպասենք տարատեսակ «լաչինի միջանցք»֊ների նման գործողություններ Հայաստանի տարածքում ։
Սա կանխատեսում չէ, սա իրադարձությունների զարգացման երաշխավորված հեռանկար է։
Արման Աբովյան
