ՌԴ ԶՈւ–ն առաջիկայում կընդլայնի հարվածային միջոցների իր զինանոցը։ Այս մասին թեմատիկ խորհրդակցության ժամանակ հայտարարել է պաշտպանության նախարար Սերգեյ Շոյգուն, նրա խոսքերն է մեջբերում ՌԻԱ Նովոստին։
Բանակում սպասվող նորամուծությունների մասին խոսելիս նախարարը հավելել է, որ բացի այդ, ՌԴ ԶՈւ–ն կապի և կառավարման միջոցների կատարելագործման համար ակտիվորեն արհեստական բանականության տարրեր կկիրառի։
Ինչ վերաբերում է Ռուսաստանի օդատիեզերական ուժերին, ապա իշխանությունները մտադիր են ժամանակակից ՀՕՊ համակարգերի գործողության գոտում բարձրացնել կործանիչների և ռմբակոծիչների կիրառման հնարավորությունը։
«Բարձրացնելու ենք նաև օդատիեզերական ուժերի մարտական հնարավորությունները և՛ ժամանակակից ՀՕՊ համակարգերի գործողությունների գոտում կործանիչների և ռմբակոծիչների աշխատանքի, և՛ անօդաչուների կատարելագործման մասով», – ասել է Շոյգուն։
Զինկոմիսարիատների թեմային անդրադառնալով` Շոյգուն հայտնել է դրանց աշխատանքի սպասվող արդիականացման մասին, որի շրջանակում նախատեսվում է իրականացնել տվյալների բազայի թվայնացում, փոխգործակցություն հաստատել տեղի և մարզային իշխանությունների, ինչպես նաև արդյունաբերության հետ, թարմացնել քաղաքացիական և տարածքային պաշտպանության կազմակերպման համակարգը։
Նա նշել է նաև, որ պաշտպանական գերատեսչությունը մտադիր է բարելավել քաղաքացիական նախաձեռնություններին արձագանքելու մեխանիզմները, նախաձեռնություններ, որոնցից «որոշներն, անկասկած, ավելի մեծ ուշադրության են արժանի»։
Ինչ վերաբերում է միջուկային եռյակին, ՌԴ պաշտպանության նախարարը վստահեցրել է` ՌԴ–ն մտադիր է աջակցել դրա մարտունակությանը` որպես ինքնիշխանության և երկրի տարածքային ամբողջականության երաշխիք։
