Ամերիկայի Միացյալ Նահանգների Ներկայացուցիչների պալատի կոնգրեսական, դեմոկրատական Ադամ Շիֆը «Հարգելի գործընկեր» (“Dear Colleague”) նամակով իր գործընկերներին կոչ է արել միանալ իրեն՝ պահանջելով, որ ԱՄՆ-ի Առևտրի նախարարությունը բացատրի, թե ինչու է քննարկում Ադրբեջանին ամերիկյան գերհզոր հրացանների վաճառքը՝ հաշվի առնելով, որ Ադրբեջանը 125 օրից ավելի շրջափակման մեջ է պահում Արցախն ու շարունակում հարձակումները Հայաստանի վրա: Այս մասին հաղորդում է Ամերիկայի Հայ դատի հանձնախումբը՝ իր աջակցությունը հայտնելով ԱՄՆ Կոնգրեսի բոլոր անդամներին, որոնք դեմ են Ադրբեջանին զենքի վաճառքին:
Ադամ Շիֆն իր գործընկերներին կոչ է անում համաստորագրել Առևտրի նախարար Ջինա Ռայմոնդոյին ուղղված նամակը, որով «Առևտրի նախարարությունից լրացուցիչ տեղեկություններ կպահանջվեն Ադրբեջանին մահաբեր զենքեր ուղարկելու համար արտահանման լիցենզիաների ցանկացած հարցման կարգավիճակի մասին»:
Դեմոկրատական կոնգրեսականը հայտարարել է, որ «Հայաստանի դեմ ուղղված ավելի մահաբեր զենքի արտահանման հաստատումը միայն կհրահրի հակամարտությունը»: Շիֆը նաև վկայակոչել է ԱՄՆ պետական քարտուղարության՝ 2022 թ.-ի Մարդու իրավունքների զեկույցը, որում «արժանահավատ տեղեկություններ կան ապօրինի սպանությունների մասին, որոնք ներառում են ադրբեջանական կալանքի տակ գտնվող հայ զինվորների խմբային մահապատիժներ, խոշտանգումներ և դաժան, անմարդկային կամ նվաստացուցիչ վերաբերմունք՝ անպատժելիության բարձր մակարդակով»:
Կոնգրեսի անդամները պետք է համաստորագրեն Առևտրի նախարար Ռայմոնդոյին ուղղված նամակը մինչև ուրբաթ օրը՝ ապրիլի 21-ը:
Ամերիկյան հրացանների, այդ թվում՝ հարձակողական և կիսաավտոմատ դիպուկահար զենքի հնարավոր վաճառքի մասին լուրերը տարածվել էին փետրվարի 1-ին: Այդ ընթացքում ԱՄՆ Սենատի արտաքին հարաբերությունների հարցերով հանձնաժողովի նախագահ Ռոբերտ Մենենդեսը նախարար Ռայմոնդոյին ուղղված նամակում խորը մտահոգություն էր հայտնել դրա մասին:
Հայ դատի հանձնախմբի փոխանցած տեղեկատվության մեջ նշվում է նաև, որ հանձնախմբի գլխավոր տնօրեն Արամ Համբարյանն ու հանձնախմբի՝ Ռոդ Այլանդի մասնաճյուղի նախագահ Սթիվ Էլմասյանը փետրվարի 13-ին ԱՄՆ առևտրի նախարար Ջինա Ռայմոնդոյին ուղղված նամակում Բաքվին ռազմական օգնություն տրամադրելու առնչությամբ նույնպես մտահոգություն են հայտնել:
