Հունիսի 24-25-ը «Տաթևեր» ճոպանուղու Հալիձոր և Տաթև կայաններում, Տաթևի վանքում և Հին Հալիձորում լքված գյուղում տեղի ունեցավ Սյունիքի պատմության և լեգենդների յուրօրինակ «Սարերում» իմերսիվ փառատոնը։ Փառատոնի շրջանակներում ներկայացված են ռազմավարական չորս զբոսաշրջային ուղղությունները՝ մշակութային, արկածային, գաստրո և բնություն։
«Տաթեւի վերածնունդ» ծրագրի հասարակության հետ կապերի պատասխանատու Սամվել Ալեքսանյանը լրագրողների հետ զրույցում ասաց․
«Երբ 13 տարի առաջ Ռուբեն Վարդանյանը, նրա ընկերները եւ համախոհները որոշեցին, որ պետք է կառուցել «ՏաԹեւեր» ճոպանուղին, հիմք դրվեց նաեւ «Տաթեւի վերածնունդ» ծրագրին, որով կարելի է ասել, դրվեց Տաթեւի նոր պատմության հիմքը։ Ուղիղ 13 տարի հետո մենք այստեղ ենք ու ներկա ենք «Սարերում» խորագիրը կրող փառատոնին։ Խորագիրը շատ կարեւոր է, մանավանդ այս տարիներին, քանի որ Սյունիքը, հատկապես այս ժամանակահատվածում մեր երկրի կարեւորագույն մարզերից մեկն է։ Մենք փորձել ենք ստանալ հին պատմության եւ ժամանակակից մթնոլորտի մի համաձուլում։ Փառատոնում անցկացվում են իմերսիվ բեմադրություններ, որոնք առաջին անգամ ենք տարածաշրջանում տեսնում։ Այսինքն, հյուրերը ոչ միայն դիտում են դրանք, այլեւ մասնակցում են բեմադրություններին, որտեղ վերածնվում են Տաթեւում տարբեր դարաշրջաններում տեղի ունեցած իրադարձությունները եւ կարեւոր անձինք, մասնավորապես, Ստեփանոս Օրբելյանը, Դավիթ Բեկը, Գարեգին Նժդեհը՝ այն ամենակարեւոր կերպարները, որոնցով Սյունիքը ապրեց, վերածնվեց»։
Սամվել Ալեքսանյանն ընդգծեց, որ «ՏաԹեւեր» ճոպանուղու գործարկումից հետո Տաթեւ այցելող զբոսաշրջիկների թիվը տարեկան 5 հազարից դարձել է ավելի քան 150 հազար։
Տաթեւ խոշորացված համայնքի ղեկավարի տեղակալ, «Ապրելու երկիր» խմբակցության ղեկավար Մարատ Գերասիմյանը լրագրողների հետ զրույցում նշեց, որ 13 տարի առաջ Տաթեւի ճոպանուղու ստեղծումը տարածաշրջանում արթնացրել է 90 տոկոսից ավելի աշխուժություն զբոսաշրջային ոլորտի, ենթակառուցվածքների ստեղծման տեսանկյունից։
«Միանշանակ է, որ ճոպանուղու այստեղ հայտնվելը խթան է հանդիսացել, որ պետությունը, միջազգային կամ տեղական կազմակերպությունները իրենց ներդրումներն ունենան տարածաշրջանում։ Որոշ կազմակերպություններ արդեն իսկ սոցիալական բնույթի ենթակառուցվածքներն են պարտավորվել կազմակերպել։ Նույն Ռուբեն Վարդանյանի անձի, միջազգային հարթակներում, նրա ունեցած վստահության շնորհիվ մեր տարածաշրջանը, կարելի է ասել, լրացուցիչ շունչ ստացել։ Իհարկե, շատ խնդիրներ դեռեւս սպասում են իրենց լուծմանը, սակայն միանշանակ է, որ մեկ տասնամյակում այսպիսի Հայաստանի մասշտաբով շատ քիչ տարածաշրջաններում է այսպիսի աշխուժացում արձանագրվել»,-ասաց նա։
Մանրամասները՝ տեսանյութում
