Ադրբեջանի ԱԳՆ-ն արձագանքել է Հայաստանի արտգործնախարար Արարատ Միրզոյանի՝ հուլիսի 27-ին լրատվամիջոցներին տված հարցազրույցին՝ հայտարարելով, թե «Ադրբեջանի տարածքային ամբողջականությանն ու ինքնիշխանությանը» (չակերտները՝ Tert.am) տարածքային պահանջներ ներկայացնելուց բացի, Միրզոյանը «անհիմն շահարկումներ» (չակերտները՝ Tert.am) է արել, որոնք կոպտորեն «խեղաթյուրում են» (չակերտները՝ Tert.am) բանակցային գործընթացը, ձեռք բերված պայմանավորվածությունները, ինչպես նաև «պատմական փաստերը» (չակերտները՝ Tert.am):
«Հայաստանի կողմից իրականացվող «հակաադրբեջանական արշավը» (չակերտները՝ Tert.am), տարբեր միջազգային հարթակներում ստանձնած խոստումներից ու պարտավորություններից «խուսափելը» (չակերտները՝ Tert.am), ներառյալ խաղաղության գործընթացի շուրջ բանակցությունները և միջազգային միջնորդների ջանքերը «զրոյացնող հռետորաբանությունը» (չակերտները՝ Tert.am), ապացուցում է, որ Հայաստանը «շահագրգռված չէ» (չակերտները՝ Tert.am) տարածաշրջանում խաղաղության և կայունության հարցում:
Հատկապես կարևոր է միջազգային հանրության կողմից համապատասխան գնահատականը Հայաստանի արտգործնախարարի «ագրեսիվ հռետորաբանությանը» (չակերտները՝ Tert.am). նա հայազգի բնակիչներին «վերաինտեգրելու» (չակերտները՝ Tert.am) Ադրբեջանի ջանքերին աջակցելու փոխարեն ներկայացրել է «իր սադրիչ և անտրամաբանական ցանկությունների ցանկը» (չակերտները՝ Tert.am) այս ուղղությամբ։
Այն, որ Հայաստանը, մինչ օրս «չկատարելով որևէ պայմանավորվածություն և պարտավորություն» (չակերտները՝ Tert.am), Ադրբեջանին մեղադրել է «մտացածին» (չակերտները՝ Tert.am) պայմանավորվածությունները հերքելու համար, քայլ է, որի նպատակն է «թաքցնել Հայաստանի սեփական հնարավոր սադրանքները» (չակերտները՝ Tert.am)։ Հայաստանի այս «ապակառուցողական գործողությունները» (չակերտները՝ Tert.am) պետք է դատապարտվեն և կանխվեն միջազգային հանրության կողմից»,- ասվում է Ադրբեջանի ԱԳՆ մեկնաբանության մեջ։
Հիշեցնենք, որ Միրզոյանն ասել էր, որ ՀՀ-ն իրավասություն չունի և չի կարող քննարկել Լեռնային Ղարաբաղ բեռներ տեղափոխելու այլ ճանապարհների հետ կապված հարցեր:
«Մենք վերահաստատում ենք մեր սկզբունքային դիրքորոշումը, որ Լաչինի միջանցքի անօրինական արգելափակումը պետք է վերացվի և նոյեմբերի 9-ի եռակողմ հայտարարությամբ ամրագրված ռեժիմը պետք է վերականգնվի։ Հայաստանի Հանրապետությունն իրավասություն չունի և չի կարող քննարկել Լեռնային Ղարաբաղ բեռներ տեղափոխելու այլ ճանապարհների հետ կապված հարցեր։
Հատկանշական է, որ միջազգային գործընկերներն իրենց հանրային հայտարարություններում ևս ընդգծել են, որ Լաչինի միջանցքի արգելափակման վերացումն այլընտրանք չունի և որ այլ ճանապարհներին զանազան անդրադարձերը չեն կարող դիտվել որպես այլընտրանք Լաչինի միջանցքի արգելափակման վերացմանը, որն Ադրբեջանի ուղղակի պարտավորությունն է:
Այս առումով ավելորդ չէ կրկին հիշեցնել ՄԱԿ Արդարադատության միջազգային դատարանի 2023թ. փետրվարի 22-ի և հուլիսի 6-ի իրավաբական պարտադիր ուժ ունեցող որոշումների մասին, որոնք աներկբայորեն վերահաստատում են մեր նշյալ դիրքորոշումը», — ասել էր Միրզոյանը։
Նշենք, որ Հայաստանի կառավարությունը հուլիսի 26-ին 361 տոննա մարդասիրական օգնություն է ուղարկել Արցախ. ներկայում 19 բեռնատար ավտոմեքենա կանգնած են Լաչինի միջանցքի մուտքի հատվածում: Հայաստանը խնդրել է, որ Արցախում տեղակայված ՌԴ խաղաղապահ զորախմբի ներկայացուցիչներն ընդունեն բեռն ու տեղափոխեն Արցախ, որտեղ Լաչինի միջանցքի շուրջ 8 ամիս ապօրինի արգելափակված լինելու հետևանքով մարդասիրական ճգնաժամ է հաստատված:
