Դուք կարող եք տեսնել, որ հումանիտար բեռները տեղափոխող մեքենաները, տևական ժամանակ է, գտնվում են այստեղ, մինչ այս պահը մենք քիչ ծավալով կարողանում էինք Արցախ սննդամթերք ու դեղորայք ուղարկել, բայց վերջին ժամանակահատվածում ընդհանրապես անհնար է որևէ բան տեղափոխել։ Այս մասին Կոռնիձորում դիվանագետների ու լրագրողների հետ զրույցում ասաց Սյունիքի մարզպետ Ռոբերտ Ղուկասյանը։
«Դուք տեսնում եք՝ մեքենաները այստեղ կանգնած են, ու անհնարին է դառնում այս հումանիտար բեռների տեղափոխումը դեպի սահմանից այն կողմ, դեպի 120,000 արցախցիներ։ Այնտեղ մարդիկ քաղցած են, երեխաներն են քաղցած։ Ես տեղեկացել եմ, որ Ադրբեջանի կողմից արձագանք կա, խոսում են ինչ-որ ինտեգրացիայի մասին, բայց արդյո՞ք սովամահության ճանապարհով են ուզում հասնել այդ ինտեգրացիային։ Դա, կարծում եմ, անընդունելի է, դա ճանապարհ չէ, մարդիկ սոված են։ Այս հումանիտար բեռը պետք է հասնի այն մարդկանց, ովքեր անհամբեր սպասում են, այստեղ դեղորայք է ու առաջին անհաժեշտության սննդի պարագաներ։ Այլապես մենք բոլորս ականատես ենք լինելու, թե ինչպես է իրավիճակը ամեն վայրկյան վատթարանում։ Ժամանակակից աշխարհում մարդկանց սովամահ անելու ճանապարհով ինչ-որ նպատակի հասնելը չի կարող ընդունելի լինել»,- ասաց Ռոբերտ Ղուկասյանը։
Մարզպետը դիվանագետներին ցոււց տվեց, թե որ հատվածում է գտնվում Հակարիի կամուրջը, և նշեց, որ կամրջի ողջ երկայնքով ու խորությամբ տեղակայված են ադրբեջանական զորքերը։
«Վերլուծությունները թողնում եմ ձեզ ու շնորհակալ եմ, որ այստեղ եք՝ տեղում գնահատելու իրավիճակը»,- դիմելով 17 երկրների դիվանագետներին՝ ասաց Սյունիքի մարզպետը։
