Երեկ կայացած Երևանի ավագանու ընտրություններում քաղաքական ոչ մի ուժ չի հաղթահարել 50 տոկոսի շեմը։ Կենտրոնական ընտրական հանձնաժոողովն այսօր ամփոփել է բոլոր ընտրատեղամասերի արդյունքները, որի արդյունքում հետևյալ պատկերն է ստացվել․
1. Հանրային ձայն — 6735 (9.62%), 2. ՔՊ — 22․904 (32.73%) 3. ԱԱԿ — 13․440 (19․2%) 4. Հանրապետություն — 8038 (11.49%) 5. Մայր Հայաստան — 10․461 (14.95%)
Իշխանություն ձևավորելու համար անհրաժեշտ կլինի քաղաքական ուժերի հետ կազմել կոալիցիա։
24News-ը «Հանրապետություն» կուսակցության և Երևանի ավագանու «Լույս» խմբակցության ավագանու անդամ Անի Խաչատրյանից հետաքրքրվեց արդյոք կոալիցիա կազմելու որոշում ունե՞ն։ Անի Խաչատրյանը նշեց, որ քաղաքական խորհրդի նիստ չեն ունեցել, հետևաբար չի կարող ասել՝ կոալիցիա կկազմե՞ն, թե ոչ, դեռևս որոշում չունեն։
«20 տարվա կուսակցություն ենք, նման հարցերը խորհրդի նիստում ենք որոշում, բայց այս պահին դեռ նիստ գումարելու համար օր, ժամ որոշված չէ։ Ոչ մի ուժի հետ միանալու քննարկում չենք ունեցել։ Մեր օրակարգում կոալիցիա կազմելու քննարկում չկա», — հավելեց Խաչատրյանը։
Հարցին՝ երբեք քննարկում չե՞ք ունեցել, թե որ ուժի հետ կոալիցիա կկազմեք, Խաչատրյանը պատասխանեց, որ մինչև այսօր մտածում էին, որ երևանցին այնքան գիտակից է, որ Արտակ Զեյնալյանին տալու է 50+1 քվե։
Նշենք, որ այսօր առավոտյան «Հանրային ձայն» կուսակցության ղեկավար Վարդան Ղուկասյանը հայտարարել է՝ իրենք պատրաստ են կոալիցիա կազմել «Ազգային առաջընթաց» կուսակցությունը գլխավորող Հայկ Մարությանի և «Մայր Հայաստան» դաշինքը գլխավորող Անդրանիկ Թևանյանի հետ։ «Մայր Հայաստան» դաշինքի մամուլի քարտուղար Աննա Բալյանը 24 News-ի հետ զրույցում նշեց, որ կոալիցիա կազմելու վերաբերյալ դեռևս որոշում չունեն, կտեղեկացնեն ավելի ուշ։
Հերմինե Միքայելյան
