Լրագրողների հետ հանդիպման ժամանակ Գրիգոր Մինասյանը ասաց, որ տեսան վարչապետի այցերի արդյունքում հրաժարականներ և համապատասխան պաշտոնյաների դեմ կիրառված սանկցիաներ այն առումով, որ թերի աշխատանքն անպայման պետք է ունենա իրենց հետևանքները։
Նրա խոսքով՝ քրեական վարույթներ դեռևս հարուցված չեն, բայց Հակակոռուպցիոն կոմիտեն ուսումնասիրում է՝ հասկանալու համար՝ արդյոք այդ մրցույթի հայտարարման տեխնիկական առաջադրանքներում, այնուհետև, եթե աշխատանքը հանձնման-ընդունման ակտերով ստորագրված է, կա՞ այդ տեխնիկական առաջադրանքի և հանձնման-ընդունման ակտի միջև անհամապատասխանություն, թե՞ ոչ։
Եթե առկա լինեն անհամապատասխանություններ, նրա խոսքով, բնականաբար, քրեական վարույթներ կլինեն։
«Ինչ վերաբերում է մնացած պրոցեսներին, կարծում եմ, որ շատ նորմալ գործընթաց է և երբ ղեկավարը տեսնում է, որ որևէ գերատեսչություն թերանում է, բնական է, որ պետք է լինեն հետևանքներ։ Շատ հաճախ այլ պայմաններում կամ նախկինում դա կարող էր լինել թաքնված և ոչ բացահայտ, ի ուրախություն ինձ և, կարծում եմ, մեր բազմաթիվ քաղաքացիների՝ թափանցիկ ու բաց տեղի են ունենում գործընթացներ, դա նաև ազդակ է բոլոր գերատեսչություններին, գերատեսչությունների ղեկավարներին, նախարարներին, անձամբ ինձ, թե ինչպես է պետք աշխատել և ինչ նոր նշաձող է սահմանվում երկրի ղեկավարի կողմից»,- նշեց Գրիգոր Մինասյանը։
