ԱԺ «Քաղաքացիական պայմանագիր» խմբակցության պատգամավոր Լենա Նազարյանը սպասում է ԱԺ անկախ պատգամավոր Թագուհի Թովմասյանի նամակին, գրությանը, որպեսզի կատարի դատարանի որոշումը։
Հիշեցնենք, որ դատարանը որոշել է պարտավորեցնել Լենա Նազարյանին հրապարակային ներողություն խնդրել Թագուհի Թովմասյանից «իդիոտկա» վիրավորական արտահայտության համար, ինչպես նաև Լենա Նազարյանից հօգուտ Թովմասյանի բռնագանձել 315.000 ՀՀ դրամ:
Թագուհի Թովմասյանի այսօրվա ասուլիսից հետո Panorama.am-ը դիմեց Լենա Նազարյանին։
Panorama.am— Այսօր ասուլիսում Թագուհի Թովմասյանը հայտարարեց, որ դուք դատարանի որոշմամբ պետք է ներողություն խնդրեք իրենից, սակայն մինչ օրս չեք խնդրել։ Պատրաստվո՞ւմ եք ներողություն խնդրել կամ ի՞նչ կպատասխանեք Թագուհի Թովմասյանին։
Լենա Նազարյան-Ես գիտեմ, որ դատարանը վճռով պարտավորեցրել է գումարի փոխհատուցում, սակայն ոչ տիկին Թովմասյանը, ոչ նրա փաստաբանը ոչ ինձ, ոչ իմ փաստաբանին չեն փոխանցել իր հաշվեհամարը։ Թող նամակ, գրություն ուղարկեն, ես համապատասխան գործողություններն անեմ։ Այսքանը կարող եմ ասել։
Panorama.am-Բացի փոխհատուցումից, նաև 1000 տպաքանակ ունեցող հայալեզու մամուլում պետք է հրապարակավ ներողություն խնդրեք։
Լենա Նազարյան-Ես այսքանը կարող եմ պատասխանել։ Ես ոչ իրենից, ոչ փաստաբանից դատարանի վճիռը կատարելու համար համապատասխան տեղեկություն չեմ ստացել, որպեսզի կատարեմ։
Panorama.am-Եթե ստանաք, նաև ներողությո՞ւն կխնդրեք։
Լենա Նազարյան-Թող նամակն ուղարկեն… Ես իրենցից ոչ մի բան չեմ ստացել։ Հասկանո՞ւմ եք։ Ասուլիս են անում, ինչ-որ բան են հայտարարում, սակայն ոչ ես, ոչ փաստաբանը ոչ մի տեղեկություն չենք ստացել։
Panorama.am-Դատարանի որոշումը բավարար չէ՞։
Լենա Նազարյան-Չունեմ ես իր հաշվեհամարը։ Ի՞նչ է, գումար կանխիկացնեմ, տանեմ Ազգային ժողովի դահլիճում իրեն վճարե՞մ։
Panorama.am-Բացի գումարից, նկատի ունեմ ներողությունը։
Լենա Նազարյան-Ես դա պատասխանեցի՝ ոչ իրենից, ոչ իր փաստաբանից որևէ տեղեկություն չեմ ստացել՝ ինչպես կատարեմ դատարանի վճիռը։
