Կառավարության այսօվա նիստին վարչապետ Նիկոլ Փաշինյանը նշեց, որ Ադրբեջանը հրաժարվում է սահմանագծում իրականացնելու երկու տարբերակներից, ինչը, ըստ Փաշինյանի, խոսում է ռազմական էսկալացիա իրականացնելու Ադրբեջանի մտադրության մասին։
Ըստ Փաշինյանի՝ ՀՀ կառավարության քաղաքականությունն է՝ ակտիվ բանակցություններում ներգրավելու միջոցով անել հնարավորը նման զարգացումները կանխելու համար՝ միևնույն ժամանակ ամուր կանգնելով ՀՀ բոլոր լեգիտիմ շահերի պաշտպանության դիրքերում։ Այդ լեգիտիմ շահերն են ՀՀ տարածքային ամբողջականության, ինքնիշխանության պաշտպանությունը։
Փաշինյանը հավելեց, որ չի կարող չնկատել, որ պաշտոնական Բաքվից վերջին օրերին հնչող մի շարք հայտարարություններ ՀՀ օրենսդրական դաշտի մասին մեր երկրի ինքնիշխանության խախտում են և միջամտություն մեր երկրի ներքին գործերին։ Փորձերը՝ մեկնաբանելու, թե ՀՀ օրենսդրությունում խաղաղության պայմանագրի ստորագրությանը խանգարող որևէ դրույթ կա, իրականության հետ որևէ կապ չունեն։
Ինչպես ինքն է ասել խաղաղության պայմանագրի բանակցությունների ընթացքում ՀՀ-ին ու Ադրբեջանին հաջողվել է մի շարք հոդվածների վերաբերյալ գալ համաձայնության և դրանցից մեկն այն մասին է, որ կողմերը չեն կարող հղում անել իրենց օրենսդրության վրա խաղաղության պայմանագրի որևէ դրույթից հրաժարվելու համար, հետևաբար ՀՀ օրենսդրության մեջ խաղաղության պայմանագրի իրագործմանը խոչընդոտող որևէ դրույթ չկա։
Նա նաև ասաց, որ Ադրբեջանը շարունակում է իր սպառնալից հռետորաբանութունը նաև բանակի բարեփոխման և սպառազինություն ու տեխնիկա ձեռք բերելու կապակցությամբ։
Նիկոլ Փաշինյանը ընդգծեց ՀՀ-ի հավատարմությունը խաղաղության օրակարգին։
