ԱԺ նախկին նախագահ Արա Բաբլոյանը և ԱԺ աշխատակազմի ղեկավարի նախկին տեղակալ Արսեն Բաբայանն արդարացվել են՝ արարքում հանցակազմի բացակայության հիմքով։ Երևանի ընդհանուր իրավասության դատարանը՝ դատավոր Հարություն Մանուկյանի նախագահությամբ, հրապարակել է արդարացման վճիռը՝ ճանաչելով և հռչակելով նրանց անմեղությունն առաջադրված մեղադրանքում, գրում է «Փաստինֆո»-ն։
Հիշեցնենք, որ Արա Բաբլոյանի և Արսեն Բաբայանի նկատմամբ հետապնդումներն իրականացվել են 2019թ․-ին։ Արա Բաբլոյանին մեղադրանք է առաջադրվել ՀՀ քրեական (2003թ․) օրենսգրքի 308-րդ հոդվածի 2-րդ եւ 314-րդ հոդվածի 1-ին մասերով, իսկ Արսեն Բաբայանին` ՀՀ քրեական (2003թ․) օրենսգրքի 38-308-րդ հոդվածի 2-րդ եւ 314-րդ հոդվածի 1-ին մասերով։
Ըստ մեղադրանքի՝ Արա Բաբլոյանը 2018թ․ հանդիսանալով Հայաստանի Հանրապետության Ազգային ժողովի նախագահը, մշտապես իշխանության ներկայացուցչի գործառույթներ իրականացնող պաշտոնատար անձ չարաշահել է իր պաշտոնեական լիազորությունները, որն անզգուշությամբ առաջացրել է ծանր հետեւանքներ, ինչպես նաեւ կատարել է պաշտոնեական կեղծիք։ Իսկ Արսեն Բաբայանը 2018թ․ մարտի 5-ին համատեղության կարգով հանդիսանալով Հայաստանի Հանրապետության ԱԺ աշխատակազմի ղեկավարի տեղակալի պաշտոնակատարը, օժանդակել է ՀՀ Ազգային ժողովի նախագահ Արա Բաբլոյանին եւ այլ պաշտոնակատար անձանց՝ իրենց պաշտոնեական լիազորությունները չարաշահելուն, որն անզգուշությամբ առաջացրել է ծանր հետեւանքներ, ինչպես նաեւ կատարել է պաշտոնեական կեղծիք։ Ըստ քրեական գործի՝ ՍԴ նախկին նախագահ Գագիկ Հարությունյանի հրաժարականի դիմումն իրականում ներկայացվել է ոչ թե մարտի 2-ին, ինչպես նշված է փաստաթղթերում, այլ՝ մարտի 5-ին, ինչը, սակայն, իբրև խեղաթյուրվել է, ինչն էլ հիմք է դարձել Հրայր Թովմասյանի թեկնածությունը թափուր մնացած պաշտոնում հետագայում առաջադրելու, նրան ՍԴ նախագահ նշանակելու համար, որի հետևանքով էական վնաս է պատճառվել ՀՀ ՍԴ իրավունքներին և օրինական շահերին, ոտնահարվել են 2018 թվականի ապրիլի 9-ից հետո գործող օրենսդրությամբ ՍԴ անդամների՝ վեց տարի ժամկետով ՍԴ նախագահ ընտրելու և ընտրվելու իրավունքները հեղինակազրկվել է դատական իշխանության տվյալ մարմինը: Նախաքննության ընթացքում Արսեն Բաբայանը կալանավորվել է, ապա՝ ազատ արձակվել։ Ավելի քան երեք տարի տևած քննության արդյունքում դատարանը հունվարի 15-ին հրապարակել է վճիռը։
Դատարանն արձանագրել է, որ ապացույցների բավարար համակցությամբ չի հիմնավորվում Արա Սաենի Բաբլոյանի կողմից 2003 թվականի ապրիլի 18-ի ՀՀ քրեական օրենսգրքի 308-րդ հոդվածի 2-րդ մասով հանցանքի կատարման դիտավորությունը (սուբյեկտիվ կողմը)։ Անդրադառնալով Արսեն Հակոբի Բաբայանին 2003 թվականի ապրիլի 18-ի ՀՀ քրեական օրենսգրքի 38-308-րդ հոդվածի 2-րդ մասով առաջադրված մեղադրանքին՝ Դատարանն արձանագրում է, որ նախ արդեն իսկ Արա Սաենի Բաբլոյանին այդ մասով առաջադրված մեղադրանքով հանցակազմի բացակայության պայմաններում չի կարող հաստատվել նաև Արա Բաբլոյանին օժանդակելու հանգամանքը։ Բացի դա, դատարանը նշել է, որ գործի նյութերում առկա չէ գեթ մեկ այնպիսի փաստական տվյալ, որը կարող է վերաբերել Ազգային ժողովի կանոնակարգ օրենքի կիրառման վերաբերյալ Արսեն Հակոբի Բաբայանի առնչության մասին։
Ի դեպ, դատարանի այս որոշումը հրապարակվել է հունվարի 15-ին, ինչին էլ հաջորդել է ԲԴԽ-ի կողմից հրապարակված հայտնի տեսանյութը, որում անդրադարձ է կատարվել իբրև 5 աղմկահարույց գործերով ձգձգումներին և տապալումներին, և այդ գործերից մեկով՝ Լևոն Երանոսյանի վերաբերյալ, թիրախավորվել էր դատավոր Հարություն Մանուկյանը։ Թե որքանով է Արա Բաբլոյանի և Արսեն Բաբայանի գործով արդարացման դատական ակտը կապված՝ դեռևս քննության փուլում Լևոն Երանոսյանի գործով դատավորի թիրախավորումը, կլինեն արդյոք հետապնդումներ, թե՝ ոչ, առ այժմ վաղ է խոսելը, սակայն փաստ է՝ ժամանակագրորեն աղմկահարույց տեսանյութը հաջորդել է արդարացման վճռին։
