Այսօր Երևանի քաղաքապետարանի մոտ լրագրողների հետ զրույցի ժամանակ Հայկ Մարությանը ասաց, որ ըստ էության, իրեն թույլ չտվեցին մասնակցել ավագանու նիստին, սա օրենքի կոպտագույն խախտում է, նաև տեղական ինքնակառավարման մարմինների լոգիկայից դուրս է։ Նա մանրամասնեց, որ խմբակցությունն իրավունք ունի ավագանու նիստին ավագանու անդամ չհանդիսացող մեկին հրավիրել և այս նիստին հրավիրել են իրեն։
«Փաստացի այսօր մեր ֆրակցիան հրավիրել է ինձ, որպեսզի ես հինգրոպեանոց ելույթ ունենամ և այս իշխանությունը, խախտելով բոլոր օրենքները, և՛ իրավական, և՛ բարոյական, թույլ չեն տալիս ինձ ելույթ ունենալ», — նշեց Մարությանը՝ շեշտելով, ժամանակին Նիկոլ Փաշինյանն ու իր կողմնակիցներն էին պայքարում նման երևույթների դեմ։
Նրա խոսքով՝ սա խոսում է այն մասին, որ իշխանությունը վախենում է իր հինգրոպեանոց ելույթից։
Նա նաև նշեց, որ այս իշխանությունը պետք է հիշի, թե ինչ կարգախոսներով է եկել, քանի որ իրենք եկել են թալանը մերժելու համար, մինչդեռ ժողովրդին խաբում են, իսկ կոռուպցիան շարունակում է բարգավաճել։
