Բարձր եմ գնահատում ձեր անձնական առաջնորդությունն առ այն, որ դուք հստակ արտահայտվում եք խաղաղության օգտին և հավատարիմ եք ժողովրդավարության արժեքներին: Այս մասին հայտնեց ՆԱՏՕ-ի գլխավոր քարտուղար Յենս Ստոլտենբերգը՝ իր և Նիկոլ Փաշինյանի համատեղ ասուլիսի ժամանակ:
«Հայաստանը վաղուց է ՆԱՏՕ-ի գործընկերը, դրական եմ գնահատում ձեր ներդրումը ՆԱՏՕ-ի առաքելություններին ու գործողություններին»:
Ըստ նրա՝ իրենք քննարկեցինք Հարավային Կովկասում կայունության կարևորությունը, այն կարևոր է Եվրոպաատլանտյան անվտանգության համար, քանի որ հիմա կանգնած են ավելի վտանգավոր աշխարհի առջև: Այսօր Հայաստանն ու Ադրբեջանը հնարավորություն ունեն տևական խաղաղության հասնելու երկարատև հակամարտությունից հետո, կոչ է անում երկու երկրներին համաձայնության հասնել, որն ուղի կհարթի հարաբերությունների կարգավորման համար։
Նա նաև հավելեց, որ ՆԱՏՕ-ն աջակցում է Հայաստանի ինքնիշխանությանը, տարածքային ամբողջականությանը և խաղաղության ձգտումներին։
