ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի գնահատմամբ՝ Հայաստանի քաղաքական ամբողջ ներկապնակը գտնվում է Տավուշի մարզում։
Ըստ նրա՝ ընդ որում, խոսում են բաներ, որը չի համապատասխանում իրականությանը։ Գնում են, ծառերի տակ նկարվում են, ասում են՝ Հայաստանը գյուղերը տվեց։
«Գյուղերը չենք տալիս, անհնար է, գյուղ տվողը դառնում է հանցագործ։ Մենք սկսում ենք պետական սահմանի իրավական ձևավորման գործընթաց»,- լրագրողների հետ զրույցում ասաց նա։
Քոչարյանը նաև մանրամասնեց, որ երբ սահմանագիծը հաստատվեց՝ պաշտպանելը դառնում է շատ հեշտ։
Նրա խոսքով՝ դրանից հետո կանգնում են այն ուժերը, որոնք պատասխանատու են դրա չխախտման համար՝ սահմանապահ զորքերը։
Իսկ այն հարցին, թե ի վերջո Տավուշի մարզի՞ց է սկսվելու սահմանազատումը՝ նա արձագանքեց. «Պարզ է չէ՞, որ երբ սկսել ենք այդ հատվածից, նշանակում է՝ ինչ-որ մի տեղ, ինչ-որ փակ սենյակում պետական անվտանգության ինչ-որ մարմին նայել է, թե որտեղ է ավելի նպատակահարմար ու գտել է այդպես, դա կոչվում է Գլխավոր շտաբ»։
