Այսօր լրագրողների հետ զրույցում ԲՏԱ նախարար Մխիթար Հայրապետյանը հայտարարեց, որ ՀՀ-ՌԴ ավելի քան երեք տարի գործող ռուսական հեռուստաալիքների հեռարձակման մասին միջկառավարական համաձայնագրում շարադրված են խաղի կանոններ, սակայն չպահպանելու համար որևէ սանկցիայի մեխանիզմ գոյություն չունի։
Ըստ նրա՝ իրենք ստորագրել են փաստաթուղթը՝ ակնկալելով, որ զետեղված կետը՝ առկա խնդիրները կլուծի ու կփակի մտահոգությունները։
«Սակայն, ցավոք, ժամանակի ընթացքում եկել ենք այն եզրահանգման, որ փաստաթուղթը չի գործում։ Տխրությամբ ասեմ, որ երկու նախարարության պատվիրակության միջև կոնսուլտացիների երկու փորձերով էլ չենք կարողացել գալ կոնսենսուսի, որ, օրինակ՝ լրագրողի կամ էքսպերտի կողմից այս կամ այն արտահայտությունը խախտում է որևէ դրույթ»,- հայտնեց նա։
Հայրապետյանը նաև ասաց, որ ՀՀ-ն ունեցել է հստակ պատկերցումներ և տեղեկացրել է, որ այս ձևակերպումներով խախտումներ է տեսել և լուծում են ակնկալում։
Նրա խոսքով՝ իրենց նպատակն է՝ եթե չի աշխատում համաձայնագիրը, պարտավոր են նոր գործիքակազմով զարգացնել։ Իրենց նպատակը ո՛չ փաստաթղթի խզումն է, ո՛չ էլ հեռուստաալիքներ փակելը։ Նպատակն է՝ կողմերը հավատարիմ մնան փաստաթղթին և իրենք շատ կառուցողական են իրենց վարքագծում։
«Եթե եղել է խախտում, պետք է լինի հետևանք և, օրինակ՝ որոշ հաղորդավարներ պակաս սանձարձակություն կդրսևորեն տվյալ եթերների ընթացքում։ Այո՛, չենք բացառում համաձայնագրի խզումը»,- հավելեց նա։
