Կառավարության այսօրվա նիստում որոշում ընդունվեց, ըստ որի՝ ՀՀ պաշտպանության նախարարությունը կկրճատի այն հիվանդությունների ցանկը, որով զորակոչի ենթակա անձինք ոչ պիտանի են ճանաչվում։
Այսուհետ թեթև աստիճանի մտավոր հետամնացության, գանգոսկրերի, գլխուղեղի նորագոյացությունների՝ կիստաների և գիշերամիզության ախտանշանների դեպքում զինծառայությունից ազատվել հնարավոր չի լինի։
Պաշտպանության նախարար Սուրեն Պապիկյանը ասաց, որ վերը նշված հիվանդությունների դրսևորման համապատասխան վիճակներն առաջարկվում է սահմանափակումով պիտանի զինվորական ծառայության համար, ինչպես նաև սահմանվում են զինծառայության սահմանափակումները, որոնց շրջանակներում կիստաների առկայությամբ սահմանափակումները նախատեսվելու են զորամասի բժշկի կողմից, գիշերամիզություն հիվանդությամբ ծառայությունը շարունակվելու է օրվա հեշտացված կարգավիճակով, իսկ առանց վարքային խանգարումների մանկավարժական բարձիթողի վիճակ ունեցող զինծառայողները չեն ընդգրկվում մարտական հերթապահության, արգելվում է տրանսպորտային միջոցներ ու տեխնիկա վարելն ու անձնակազմ ղեկավարելը։
Նա նշեց, թե այսօր էլ գիշերամիզությամբ զորակոչվում են բանակ, խնդիրը հետագայում ծառայությունից ազատվելու մասին է, որովհետև, նրա խոսքով, վիճակագրական տվյալները ցույց են տալիս, որ նկատվում է վերոնշյալ հիվանդություններով ազատումների դեպքերի պրոգրեսիվ դինամիկա։
Նիկոլ Փաշինյանն էլ ասաց, թե երբ նայում են վիճակագրությունները՝ տեսնում են, որ անկանոնությունները շատ են։
Ըստ նրա՝ շատ դեպքերում իրենք առաջնորդվում են լավատեսության այն կանխավարկածով, որ եթե խոսքը վերաբերում է հայրենիքին, հայրենասիրությանը, այնտեղ պետք չէ մեղավորության կանխավարկածով առաջնորդվել, բայց, երբ խորանում ես թեմաների մեջ, տեսնում ես, որ կան բազմաթիվ սողանցքներ։
