Առիթը օգտագործելով՝ դիմում եմ ժողովրդին՝ ժամը 15։30 եղեք այստեղ՝ Բաղրամյան-Դեմիրճյան խաչմերուկ, մեր հանդիպման վայրը, որովհետև ժամը 16։00-ին ԱԺ խորհրդի նիստն է․ այս մասին Բաղրամյան պողոտայում լրագրողների հետ զրույցում հայտարարեց Բագրատ Սրբազանը։
«Այստեղ եղեք, որ մեր խնդիրների լուծմանն անցնենք։ Կարևոր է բոլորի ներկայությունն անխտիր»,- հայտարարեց նա։
Դիտարկմանը՝ ոստիկանությունը հայտարարել է, թե երեկվա դեպքերի հետ կապված, թե կանխատեսել են՝ հնարավոր է պետական պահպանության շենք գրավեն, դրա համար չեն թողել պատգամավորներին ԱԺ մուտք գործել, Սրբազանն ասաց, որ իրենք երբևէ շենք գրավելու մասին խոսե՞լ են։ Այդ շենքերը իրենցն են, գրավելու կարիք չունեն։ Բայց հաշվի առնելով ԱԳՆ դիմաց նրանց ցուցաբերած վարքը՝ հատկապես այդ մի քանի ղեկավար կոչվածներինը, ամեն ինչ պարզ է արդեն՝ ամբողջ գործողություններն ապօրինի են, որևէ օրինակ հիմք չունեն։
Սրբազանը նշեց, որ բնականաբար, իրենք իրենց օրինական պահանջներն իրականացնելու են։
Ինչ վերաբերում է այսօր սպասվող նիստին, Սրբազանն ասաց, որ նախ պետք է անվստահություն հայտնելու մասին նիստը տեղի ունենա, հաջորդական քայլերը, ըստ այդմ, կարվեն։
Նա ասաց, որ արդյունքը պետք է լինի այս մարդու կա՛մ հեռանալը, կա՛մ հեռացումը, ուրիշ ճանապարհ չկա։ Այս հաստատակամ ժողովուրդը հիմա անձրևի տակ է, գիշերն էլ նույն վիճակն էր մի հոգի չի գնացել, սա է ամենամեծ սարսափը այս մարդկանց։ Ոստիկանական շարքերը խելոք են։
Իսկ հարցին, կա՞ն երաշխիքներ՝ երբ արտահերթ նիստ հրավիրվի, ՔՊ-ականները քանակ կապահովեն, որ նիստը կայանա, նա պատասխանեց՝ կերևա, ընթացքը գնում է, կշարունակվի, կտեսնեն։
