ԱԺ-ում ՀՀ-ի` ԵՄ անդամակցության հայտ ներկայացնելու հարցով հանրաքվե անցկացնելու թեմայով լսումներին Հայաստանի Եվրոպական կուսակցության անդամ, դերասան Հովհաննես Ազոյանը հայտարարեց, որ ժողովրդավարությունն իր համար իրավունքն է, պարտավորությունն է և ապահովությունը։ Ահա այս երեք նախապայմանն է իր համար, որ կստեղծի կենսունակ միջավայր, որտեղ ինքը կզբաղվի ստեղծարար աշխատանքով, կունենա էսթետիկ կենցաղ ու կապրի երջանիկ:
«ՀՀ-ն, ըստ իր Սահմանադրության, ժողովրդավարական երկիր է։ Ասել է թե՝ ՀՀ-ն դե յուրե ժողովրդավարական երկիր է, իսկ դե ֆակտո՞։ Իմ պատասխանն է՝ ո՛չ: Ժողովրդավարությունը թերի չի լինում, ինչպես չի լինում հատվածային ժողովրդավարություն ընտրովի մոտեցմամբ կամ ժողովրդավարություն ըստ քաղաքական իրավիճակի ու ճաշակի»,- ասաց նա։
Նա հավելեց՝ կա՛մ լինում է կատարյալ, կա՛մ չի լինում ընդհանրապես։ Թերին ինքնախաբեություն է։
