Այսօր՝ օգոստոսի 1-ին, հիվանդանոցում մահացել է Դավիթ Բեկ պողոտայում 8 մեքենաների մասնակցությամբ ողբերգական վթարի մասնակիցներից մեկը՝ Արմավիրի մարզի բնակիչ 48-ամյա Կարեն Բաղդասարյանը, հաղորդում է Shamshyan.com-ը:
Նախաձեռնված քրեական վարույթի շրջանակում պարզվել էր հուլիսի 22-ին Երևանի Դավիթ Բեկի պողոտայում տեղի ունեցած ողբերգական ավտովթարի հետևանքով 2 մահացածների, վարորդների և վիրավորների ինքնությունը, ինչպես նաև «Էրեբունի» բժշկական կենտրոնում կլինիկական մահ տարած, ապա բժիշկների կողմից փրկված վիրավորի ինքնությունը։
Հիշեցնենք, որ Այդ օրը Դավիթ Բեկ փողոցում բախվել էին Երևանի բնակիչներ 50-ամյա Արտաշես Չագլասյանի վարած «ԶԻԼ» մակնիշի, 44-ամյա Տիգրան Ասլանյանի վարած «ԶԻԼ» մակնիշի բեռնատարները և Երևանի բնակիչ 47-ամյա Գագիկ Խաչատրյանի վարած «Nissan» մակնիշի, Արագածոտնի մարզի բնակիչ 60-ամյա Արարատ Պետրոսյանի վարած «BMW» մակնիշի, 28-ամյա Ժիրայր Ազիզյանի վարած «Mercedes» մակնիշի, Երևանի բնակիչ 75-ամյա Ղազար Գրիգորյանի վարած «Opel» մակնիշի, Արմավիրի մարզի բնակիչ 36-ամյա Գարիկ Սարգսյանի վարած «Toyota» մակնիշի և անհայտ անձ կողմից վարած «Volkswagen» մակնիշի ավտոմեքենաները։
Վթարի հետևանքով Ա․ Չագլասյանը և «Volkswagen»-ի վարորդը Երևանի բնակիչ 40 ամյա Սարգիս Ղարիբյանը տեղում մահացել էին, իսկ «Volkswagen»-ի ուղևորներ, Կոտայքի մարզի բնակիչ 22-ամյա Սպարտակ Ավետիսյանը և Արմավիրի մարզի բնակիչ 48-ամյա Կարեն Բաղդասարյանը մարմնական վնասվածքներով տեղափոխվել էին «Էրեբունի» բժշկական կենտրոն։
Վիրավորներից մեկը կլինիկական մահ էր տարել և սկզբից արձանագրվել էր նրա մահը, սակայն բժիշկներին հաջողվել էր նրան փրկել և վիրավորները գտնվում էին բժիշկների հսկողության տակ։
Վթարի հետևանքով 2 հոգի տեղում մահացել էին, 2 հոգի տարբեր աստիճանի մարմնական վնասվածքներով տեղափոխվել էին Երևանի տարբեր հիվանդանոցներ:
Մահացածներին ավտոմեքենայից դուրս էին բերել փրկարարները՝ օգտագործելով հատուկ տեխնիկա:
