«Ադրբեջանում պահվող հայերի դեպքում մենք կարող ենք վստահորեն օգտագործել հենց պատանդ ձեւակերպումը՝ նկատի ունենալով, որ նրանց վերադարձը կապված է որոշակի քաղաքական պահանջների բավարարման հետ։ Եվ նրանք ոչ թե պահվում են օրինական հիմքերով, այլ ստեղծված են շինծու հիմքեր, որոնք միջազգային հարթության մեջ կարող են արդարացնել չհայրենադարձումը։ Բայց իրական դրդապատճառը նրանց փոխանակումն է քաղաքական պահանջների հետ»,- Այս մասին Genesis Armenia ուղեղային կենտրոնի կազմակերպած «Մեկ տարի առանց Արցախ. վիճակագրություն ու ռազմավարական հեռանկար» խորագրով համաժողովի ժամանակ ասաց փաստաբան Սիրանուշ Սահակյանը։ Նա նշեց, որ այս պահին Բաքվի բանտերում կան 23 հայեր։ Սա պաշտոնական թիվն է, բայց պետք է ֆիքսել, որ բազմաթիվ հայեր գերեվարվել են, սակայն հետագայում ենթարկվել են բռնի անհետացման։ «Նրանց չհաստատումը դուրս է բերել այս անձանց իրավական պաշտպանության ոլորտից, եւ մենք չենք կարող հստակ հետեւություններ անել՝ նրանք ողջ են, պահվում են գաղտնի վայրերում, թե՞ սպանված են»,- ասաց նա։ Սիրանուշ Սահակյանն անդրադարձավ գերիների վերադարձի մեխանիզմներին:
