Դուք գիտեք, որ մեր ընտրությունը կանգ է առել Սրբուհի Գալյանի թեկնածության վրա, որը շատ երկար ժամանակ բարձր պաշտոններ է զբաղեցրել, այդ թվում նաև քաղաքական: Այս մասին ԱԺ-ում լրագրողների հետ զրույցում ասաց վարչապետի աշխատակազմի ղեկավար Արայիկ Հարությունյանը:
«Նա, ըստ էության, քաղաքական թիմի մաս է»,- ասաց Հարությունյանը: Լրագրողի դիտարկմանը՝ արդյո՞ք խնդրահարույց չէ, որ քաղաքական թիմի անդամը դատախազությունում բարձր պաշտոն է զբաղեցրել, Հարությունյանն ասաց.«Ես ասացի՝ քաղաքական պաշտոն է զբաղեցրել, եթե քաղաքական պաշտոն է զբաղեցնում տվյալ ժամանակահատվածում, լինում է թիմի մաս: Նա եղել է փոխնախարար, որը ևս քաղաքական թիմի մաս է»:
Հարցին՝ սկզբունքայի՞ն է եղել հենց կին նախարար ընտրելը, Արայիկ Հարությունյանն ասաց.«Սկզբունքային չի եղել, դուք գիտեք, որ եղել է 3 կին և 2 տղամարդ թեկնածու, ու ընտրությունը կանգ է առել նրա վրա, հաշվի են առել մասնագիտական կարողությունները: Կարծում եմ, որ վերջին տարիներին տիկին Գալյանն իր դիրքում լուրջ հաջողություններ է ունեցել»:
