Ռազմական ծրագրերի ու վարժանքների միջոցով Արևմուտքը փորձում է ամրապնդել իր ռազմական ներկայությունը Անդրկովկասում և իր վերահսկողության տակ վերցնել սահմանային հսկողությունը։ Այս գիծը, որն ուղղված է ոչ թե հակամարտող կողմերին հաշտեցնելուն, այլ Մոսկվային դուրս մղելուն, արդեն իսկ հանգեցրել է նոր խնդիրների ու մարտահրավերների, այդ թվում՝ Հայաստանի համար։ Այս մասին հայտարարել է Ռուսաստանի փոխարտգործնախարար Միխայիլ Գալուզինը։ ՔՊ-ն վարում է Հայաստանի ուկրաինացման քաղաքականություն՝ Արևմուտքի դրդմամբ ՌԴ-ի դեմ բացելով երկրորդ ճակատը կամ օջախն արդեն Հարավային Կովկասում։ Արևմուտքը հասկանում է, որ ուկրաինական պատերազմում Մոսկվան հաղթելու է, իսկ Հարավային Կովկասում Ադրբեջանն ու Վրաստանն ունեն լավ հարաբերություններ ՌԴ-ի հետ։ Վրաստանը չցանկացավ դառնալ երկրորդ Ուկրաինա և սկսել է խորացնել կապերը Մոսկվայի հետ։ Փաշինյանն ու ՔՊ-ն հակառուսական քաղաքական գիծ են որդեգրել, ինչը հանգեցրեց Արցախի կորստին, հայոց բանակի թուլացմանն ու այսօր Բաքուն պատրաստվում է գրավել Սյունիքը։ Արևմուտքը ցանկանում է ՌԴ-ին դուրս մղել Հարավային Կովկասից՝հենվելով ՀՀ-ում հակառուսական և արևմտամետ ցանցի վրա, որի մի մասն են կազմում ՔՊ-ականները։ ԱՄՆ-ում իշխանության է եկել Դոնալդ Թրամփը, ով ցանկանում է ավարտին հասցնել ուկրաինական պատերազմն ու կարգավորել հարաբերությունները ՌԴ-ի հետ։ Դրա համար եվրոպացիները՝Ֆրանսիան, Մեծ Բրիտանիան և այլ երկրներ սկսել են աջակցել Փաշինյանին, քանի որ Թրամփի համար Փաշինյանն ու ՔՊ-ն հետաքրքիր չեն լինելու հակառուսական ծրագրերի ենթատեքստում։ Փաշինյանն ու ՔՊ-ն նոր հակառուսական տանիք են փնտրում իրենց համար, իսկ ԵՄ պատրաստ է աջակցել Փաշինյանին, սակայն դա ունենալու է գեոպոլիտիկ գին։ Եթե ՀՀ քաղաքացիները ցանկանում են ունենալ պետականություն և չդառնալ թուրքական վիլայեթ, ապա օր առաջ պետք է հասնեն ՔՊ-ի հեռացմանը։
Անդրանիկ Պետրոսյան
