Երևանում կրակոցներ են հնչել. դեկտեմբերի 12-ին ժամը 19։20-ի սահմանում ոստիկանությունում օպերատիվ տեղեկություններ են ստացվել, իսկ կարճ ժամանակ անց ոստիկանություն է զանգահարել Երևանի Միկոյան փողոցի բնակիչ 32-ամյա մի կին և հայտնել, որ ամուսինը, որի հետ ցանկանում է ամուսնալուծվել, զինված եկել է իր տուն, կրակոցներ է արձակում իր տան ուղղությամբ։
Ինչպես հայտնում է shamshyan.com-ը, դեպքի վայր են ժամանել ոստիկաններն ու քննիչները: Տեղում պարզվել է, որ նույն օրը՝ ժամը 19։10-ի սահմանում, կնոջ ամուսինը՝ Արարատի մարզի բնակիչ 30-ամյա Սուրեն Մ․-ն, Միկոյան փողոցում իր մոտ գտնվող հրազենով երեք կրակոց է արձակել կնոջ բնակարանի դռան ուղղությամբ և հեռացել:
Վերջինս նույն օրը ներկայացել է համայնքային ոստիկանության գլխավոր վարչության Նոր Նորքի բաժին և հայտնել, որ ինքն է կրակել և իր հետ ներկայացրել է հանցագործության գործիք ատրճանակը։
Աղբյուրի տեղեկություններով՝ կինն աշխատում է Հայաստանում հայտնի կրթահամալիրներից մեկում՝ որպես դասախոս։
Դեպքի փաստով ՀՀ Քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում նախաձեռնվել է քրեական վարույթ։
